Qazaqstan Halal ónimderiniń eksportyn arttyrýǵa múddeli
ASTANA. KAZINFORM — 14–15 mamyr kúnderi Qazaqstan Respýblıkasynyń Saýda jáne ıntegratsııa mınıstri Arman Shaqqalıev Qazan qalasyna (Tatarstan Respýblıkasy, RF) baryp, «Reseı — Islam álemi: KazanForum 2026» XVII halyqaralyq ekonomıkalyq forýmyna qatysty. Qazaqstan delegatsııasynyń quramyna QR Saýda jáne ıntegratsııa birinshi vıtse-mınıstri Aıjan Bıjanova, QR-nyń Qazandaǵy Bas konsýly Erlan Ysqaqov, sondaı-aq Qazaqstan Respýblıkasy Saýda jáne ıntegratsııa mınıstrliginiń jáne ózge de memlekettik organdardyń ókilderi kirdi. Bul týraly vedomstvonyń baspasó qyzmeti málim etti.
Forým aıasynda Qazaqstannyń Reseı Federatsııasy óńirlerimen jáne ıslam álemi elderimen saýda-ekonomıkalyq, ınvestıtsııalyq ári óńiraralyq yntymaqtastyǵyn nyǵaıtýǵa baǵyttalǵan birqatar ekijaqty kezdesýler men iskerlik is-sharalar uıymdastyryldy.
Sapar barysynda A. Shaqqalıev Tatarstan Respýblıkasynyń Raısy R. Mınnıhanovpen, Mordovııa Respýblıkasy Úkimetiniń Tóraǵasy B. Emeevpen, Chývash Respýblıkasy Mınıstrler Kabınetiniń Tóraǵasy S. Artamonovpen, sondaı-aq bıznes qaýymdastyq ókilderimen kezdesti. Kezdesýler barysynda taraptar Qazaqstan Respýblıkasy men Reseı Federatsııasy arasyndaǵy ınvestıtsııalyq yntymaqtastyqtyń qazirgi ahýaly men óńiraralyq baılanystardy keńeıtý perspektıvalaryn talqylady.
Mınıstr sondaı-aq «International Property Market» halyqaralyq jyljymaıtyn múlik kórmesi men konferentsııasyna qatysyp, «Jasandy ıntellekt — qurylys salasyndaǵy jańa tıimdilik» plenarlyq sessııada sóz sóıledi. Іs-shara barysynda tsıfrlyq sheshimderdi engizý, zamanaýı tehnologııalardy paıdalaný jáne qurylys salasynyń tıimdiligin arttyrý máseleleri qarastyryldy.
— Forým sheńberinde ıslam ekonomıkasy men Halal ındýstrııasyn damytý máselelerine erekshe nazar aýdaryldy. Qazaqstan otandyq Halal ónimderiniń shetel naryqtaryndaǵy úlesin keńeıtýge, tıisti ınfraqurylymdy damytýǵa, standarttaý júıesin jetildirýge jáne ıslam álemi elderimen kooperatsııany nyǵaıtýǵa múddeli ekenin rastady. Sonymen qatar, Halal ındýstrııasy shıkizattyq emes eksportty damytý men ınvestıtsııa tartýdyń perspektıvaly baǵyttarynyń biri ekeni ataldy, — delingen habarlamada.
Qazan qalasyna sapary aıasynda A. Shaqqalıev ITAR-TASS, «Habar» jáne «Qazınform» aqparat agenttikterine suhbat berip, Qazaqstan men Reseı Federatsııasy arasyndaǵy saýda-ekonomıkalyq yntymaqtastyqty odan ári nyǵaıtýdyń, ınvestıtsııalyq ózara is-qımyldy damytýdyń jáne óńiraralyq baılanystardy keńeıtýdiń mańyzdylyǵyna toqtaldy.
Qazaqstan delegatsııasynyń KazanForum 2026 forýmyna qatysýy iskerlik baılanystardy keńeıtýge, elimizdiń ekonomıkalyq áleýetin halyqaralyq deńgeıde ilgeriletýge, sondaı-aq saýda, ınvestıtsııa, Halal ındýstrııasy, tsıfrlandyrý, logıstıka jáne ónerkásip salalaryndaǵy praktıkalyq yntymaqtastyqty nyǵaıtýǵa yqpal etti.
Aıta keteıik, BAÁ men Úndistan elimizden halal et ónimderin alǵysy keledi.
