Qazaqstan ǵylymy azamattardyń ómir sapasyn arttyrýǵa sonshalyqty úles qosa almaı keledi
«Joǵary bilim, ǵylym salalarynyń qoǵam men el ekonomıkasy damýynda alatyn orny erekshe. Búginde álem ekonomıkasyn alǵa jetelep otyrǵan negizgi resýrstardyń biri – ıntelektýaldyq kapıtal. Eger osyny eskersek, ǵylymı tehnologııalyq damý salasynda qoǵam bizden naqty ózgeristerdi kútýde. Sondyqtan mınıstrliktiń basty mindeti – otandyq ǵylymı-tehnologııalyq ınnovatsııalyq jetistikterdiń ekonomıkaǵa úlesin arttyrý, joǵary bilimniń eńbek naryǵynyń jańa talpaptaryna saı mamandar ázirleýin qamtamasyz etý. Joǵary bilim men ǵylymdy damytýda birtutas salaaralyq saıasaty qalyptastyrý qajet. Osyǵan baılanysty mınıstrliktiń aldynda birqatar mindetter tur», - dedi vıtse-premer QR ǵylym jáne joǵary bilim mınıstrliginiń keńeıtilgen alqa májilisinde.
Onyń atap ótýinshe, birinshi kezekte Memleket basshysy Qasym-Jomart Toqaevtyń Qazaqstan halqyna Joldaýynda, Úkimettiń keńeıtilgen otyrysynda bergen tapsyrmalaryn oryndaýǵa, sondaı-aq Prezıdenttiń saılaýaldy baǵdarlamasyn iske asyrýǵa basa nazar aýdarýymyz qajet.
«Aldymen ǵylym salasynyń máselelerine toqtalsaq, respýblıkalyq bıýdjetten ǵylymdy qarjylandyrý 2019 jylmen salystyrǵanda 2 esege artty. 2019 jyly 40 mlrd teńge bolsa, ótken jyldyń qorytyndysynda 80 mlrd teńgeden asty. Bul – úlken qoldaý. Degenmen, otandyq ǵylym kóptegen damyǵan elderdegideı ekonomıkanyń damýyna jáne azamattardyń ómir sapasyn arttyrýǵa biz kútkendeı aıtarlyq úles qosa almaı keledi. Bizdiń ekonomıkamyzǵa otandyq ǵylymı jetistikterdiń nátıjesinde ázirlengen joǵary tehnologııalyq ónim shyǵaratyn óndiris kólemi áli de jetkilisiz. Sondyqtan ǵylymı-tehnologııalyq saladaǵy ǵylymı jańalyqtardy ekonomıkaǵa engizýge baılanysty keshendi jumystar júrgizýimiz qajet», - dedi Altaı Kólginov.
