Qazaqstan gýmanıtarlyq kómek retinde Qyrǵyzstanǵa un jiberdi

BІShKEK. QazAqparat - 29 sáýir kúni Qazaqstannan gýmanıtarlyq kómek retinde jiberilgen 800 tonna un Qyrǵyz Respýblıkasyna jetkizildi. Bul týraly Qazaqstannyń Syrtqy ister mınıstrliginen málim etti, dep habarlaıdy QazAqparat.

Atap ótilgendeı, bul, Qyrǵyz eline kórsetiletin gýmanıtarlyq kómektiń alǵashqy partııasy.

Júk barlyq sanıtarlyq-epıdemıologııalyq normalar saqtala otyryp, temirjol arqyly 12 vagonmen jetkizildi.

«Qazaqstan Prezıdenti Qasym-Jomart Toqaev pandemııaǵa qarsy kezeńde kórshi elderge qoldaý kórsetý maqsatynda Qyrǵyzstan men Tájikstanǵa jalpy somasy 3 mln AQSh dollarynan astam qarajatqa ár elge 5 myń tonna kóleminde un túrinde gýmanıtarlyq kómek berý týraly sheshim qabyldaǵanyn atap ótken jón. Qyrǵyzstannyń Aýyl sharýashylyǵy, tamaq ónerkásibi jáne melıoratsııa mınıstri Erkınbek Chodýevtyń aıtýynsha, qyrǵyz tarapy Qazaqstan Respýblıkasynyń Úkimeti kórsetken kómekti joǵary baǵalaıdy jáne baýyrlas qazaq halqyna tereń rızashylyq bildiredi», - delingen SІM aqparatynda.

Gýmanıtarlyq kómek Qyrǵyz Respýblıkasy Úkimetiniń janyndaǵy Memlekettik materıaldyq rezervter qorynyń qoımasyna ornalastyryldy.