Qazaqstan Gýanchjoýdaǵy halyqaralyq kitap kórmesinde ulttyq pavılonyn tanystyrdy
ASTANA. KAZINFORM — Gýanchjoý qalasynda bıyl 30-shy ret uıymdastyrylǵan Ońtústik Qytaı kitap kórmesi saltanatty túrde ashyldy. Bul — Qytaıdaǵy kitap jáne baspa isi salasyndaǵy aýqymdy kórmelerdiń biri. Qazaqstan atalǵan jıynǵa ekinshi jyl qatarynan qatysyp, ulttyq pavılonyn tanystyrdy.
Іs-sharanyń ashylý saltanatyna Mádenıet jáne aqparat mınıstrliginiń, dıplomatııalyq korpýs pen Qytaıdyń mádenıet salasynyń ókilderi qatysty.
Ulttyq pavılonda qazirgi qazaq ádebıeti men balalar shyǵarmalary, mádenı mura jáne kreatıvti ındýstrııa salalaryn qamtıtyn 100-ge jýyq kitap pen mádenı ónim qoıylǵan.
Ekspozıtsııada Abaı Qunanbaıuly, Muhtar Áýezov, Shoqan Ýálıhanov, Ybyraı Altynsarın, Ahmet Baıtursynuly jáne basqa da kórnekti tulǵalardyń shyǵarmashylyǵy men murasyna arnalǵan basylymdar usynylǵan.
Sondaı-aq qazaq halqynyń epostyq jáne folklorlyq murasy, salt-dástúri, qolóneri, ulttyq kıimderi men taǵamdary, kıiz úı mádenıeti týraly kitaptar bar.
Kórme aıasynda «Túrkistan» jáne «Sheksiz mýzyka: Dımash» kitaptarynyń tanystyrylymy ótti. Kópshilikke qazaqtyń dástúrli qolóner úlgileri kórsetilip, ulttyq mádenıettiń erekshelikteri tanystyryldy.
Eske salaıyq, bıyl Qazaqstan Respýblıkasy Mádenıet jáne aqparat mınıstrligi men Qytaı Halyq Respýblıkasynyń Memlekettik baspasóz jáne baspa isteri basqarmasy klassıkalyq shyǵarmalardy aýdarý jáne basyp shyǵarý jónindegi yntymaqtastyq týraly memorandýmǵa qol qoıdy. Qujat aıasynda aldaǵy bes jylda qazaq jáne qytaı ádebıetiniń 30-ǵa jýyq týyndysyn aýdarý josparlanyp otyr.
Qazaqstannyń mádenı baǵdarlamasy QR Mádenıet jáne aqparat mınıstrliginiń, Beıjińdegi Qazaqstan mádenı ortalyǵynyń, Qazaq-Oner ulttyq qaýymdastyǵynyń, Qazaqstannyń Qytaıdaǵy Elshiliginiń, Gýanchjoýdaǵy Bas konsýldyǵynyń jáne Nomad Culture Foundation qorynyń qoldaýymen uıymdastyryldy.
Kórme 27-31 tamyz aralyǵynda Gýanchjoý qalasyndaǵy China Import and Export Fair Complex kesheninde ótedi.
Aıta ketelik elimizde biryńǵaı ulttyq elektrondy kitaphana qurylatyny týraly jazǵan edik.
