Qazaqstan Gýanchjoýda ótetin jazǵy Azııalyq oıyndarda boksshylarǵa úmit artýda
BEIJІŃ. Qazannyń 22-si. QazAqparat /Rýslan Súleımenov/ - Qytaıda ótetin jazǵy Azııalyq oıyndarda Qazaqstannyń atynan óner kórsetetin boksshylarymyzdyń quramy anyqtaldy. QazAqparat tilshisine bul týraly Qazaqstannyń boks federatsııasynyń vıtse-prezıdenti Jambolat Sársenov habarlady.
Sport sheneýniginiń aıtýynsha, Azıadada óner kórsetetin bokstan erler jáne áıelder quramalary tolyq jasaqtalyp bitti. Eki komandanyń da áleýeti úlken, olar Gýanchjoýǵa tolyq quramda attanady.
«Qazaqstandyq boksshylar delegatsııasynyń qatary úlken bolady, sebebi boks - biz árqashan úmit artatyn sporttyń túri. Qaı jaqtan bolsa da, medalsyz qaıtqan kezimiz joq. Azıada oıyndaryndaǵy bizdiń negizgi qarsylastarymyz - Qytaı, Úndistan, Soltústik jáne Ońtústik Koreıa», - deıdi J.Sársenov.
Jazǵy Azııalyq oıyndar aǵymdaǵy jyly qarashanyń 12-si men 27-si aralyǵynda Qytaıdyń Gýanchjoý qalasynda ótedi.
