Qazaqstan Grýzııanyń negizgi saýda seriktesteriniń qataryna endi

ASTANA. KAZINFORM — 2025 jyldyń qańtar–qarasha aılarynyń qorytyndysy boıynsha Qazaqstan Grýzııanyń syrtqy saýdasyndaǵy jetekshi baǵyttardyń biri bolyp, grýzın eksporty boıynsha alǵashqy úsh eldiń qataryna kirdi. Bul týraly Grýzııanyń Ulttyq statıstıka qyzmeti málimdedi (Geostat).

Esepti kezeńde Grýzııadan Qazaqstanǵa eksporttalǵan taýar kólemi 849,9 mln AQSh dollaryn qurady. Bul 2024 jyldyń osy kezeńimen salystyrǵanda 6,8%-ǵa joǵary. Qazaqstannyń Grýzııa eksportynyń jalpy kólemindegi úlesi 12,8%-ǵa jetip, eldi negizgi eksporttyq seriktester arasynda ekinshi orynǵa shyǵardy. Bul kórsetkish boıynsha Qazaqstan tek Qyrǵyzstanǵa jol berdi.

2025 jyldyń qańtar-qarasha aılarynda Grýzııa men Qazaqstan arasyndaǵy jalpy taýar aınalymy 925,7 mln dollardy qurady. Onyń ishinde Qazaqstannan Grýzııaǵa ımport kólemi 75,8 mln dollar deńgeıinde qalyptasyp, eldiń jalpy ımportynyń 0,5%-yn ǵana qurady.

Grýzııanyń jalpy syrtqy saýda aınalymy qurylymynda Qazaqstan tórtinshi orynǵa jaıǵasyp, eldiń jıyntyq taýar aınalymynyń 4%-yn qamtamasyz etti. Bul kórsetkish boıynsha Qazaqstan Túrkııa, Amerıka Qurama Shtattary jáne Reseı Federatsııasynan keıin tur.

Jalpy alǵanda, 2025 jyldyń qańtar-qarasha aılarynda Grýzııanyń syrtqy taýar saýdasynyń kólemi 23,22 mlrd dollardy qurap, ótken jyldyń sáıkes kezeńimen salystyrǵanda 9,5%-ǵa artty. Eksport 10,1%-ǵa ósip, 6,62 mlrd dollarǵa, ımport 9,3%-ǵa ósip, 16,60 mlrd dollarǵa jetti. Syrtqy saýdadaǵy teris saldo 9,98 mlrd dollardy, ıaǵnı jalpy aınalymnyń 43%-yn qurady.

Geostat derekterine sáıkes, esepti kezeńde Grýzııa eksportynyń 70%-y TMD elderine baǵyttalǵan. Osy baǵytta Qazaqstan grýzın ónimderi úshin negizgi ótkizý naryqtarynyń biri bolyp qala beredi.

Ulttyq statıstıka qyzmeti usynylǵan málimetterdiń aldyn ala sıpatta ekenin jáne keıin naqtylanýy múmkin ekenin habarlady.

Aıta keteıik, buǵan deıin Qazaqstan Grýzııadan eń kóp avtokólik ımporttaǵan el atanǵany habarlanǵan bolatyn.