Qazaqstan Grýzııaǵa týrısteri jıi saparlaıtyn úzdik 10 eldiń qataryna kirdi

ASTANA. KAZINFORM — Osy jyldyń 1-toqsanynda Grýzııaǵa 21 625 otandasymyz saıahatshy retinde saparlaǵan.

Halyqaralyq saparlaýshylar sany boıynsha elimiz 9-orynda tur. Degenmen, bul 1 jyl burynǵy kórsetkishten 22,4 paıyzǵa az. Mundaı derekti Grýzııa Ulttyq týrızm ákimshiligi usynyp otyr.

Tizimniń kósh basynda Túrkııa tur — 225 265 adam (11,5 paıyz ósim). Odan keıingi orynǵa 219 264 saıahatshysy (1,8 paıyz ósim) Grýzııaǵa barǵan Reseı tur. Al úzdik úshtikti Armenııa túıindeıdi. Bul elden 180 805 saıahatshy osy jyldyń alǵashqy úsh aıynda Grýzııaǵa saparlanǵan. Alaıda, bul ótken jyldaǵy kórsetkishpen salystyrǵanda 5,7 paıyzǵa az.

Atalǵan kezeńde Grýzııa Izraıl, Ázerbaıjan, Iran, Úndistan, Ýkraına jáne Belarýs týrısteri arasynda tanymal baǵyt boldy. Osy baǵyttaǵy eń qarqyndy týrıstik aǵyndy Izraıl kórsetip otyr — 72,9 paıyzǵa (80 896 kelýshi) kóp.

Sondaı-aq, vızasyz rejımdi engizý nátıjesinde Qytaıdan (40,1 paıyz ósim, 13 875 saıahatshy) jáne jańa reısterdiń arqasynda Úndistan (+27,7%) men Iordanııadan (+44,7%) keletin saıahattaýshylar sany arta tústi.

Eýropa odaǵy elderinen birinshi toqsanda Grýzııaǵa 73 886 adam keldi — bul ótken jylmen salystyrǵanda 4 paıyzǵa az. Tómendeý EO-nyń 27 eliniń 15-inde baıqalady.

Bul rette Polshadan (10,1 myń saıahatshy, - 3,4%), Lıtvadan (3,4 myń saıahatshy, -29,2%), Latvııadan (3,3 myń saıahatshy, -14,9%) jáne Estonııadan (1,3 myń saıahatshy, -17,8%) keletin saıahatshylardyń legi aıtarlyqtaı tómendegen.

Germanııa saıahatshylar sany boıynsha EO elderi arasynda kóshbasshy bolyp qala beredi — 10,2 myń adam. Biraq bul elden Grýzııaǵa keletin saıahatshylar qatary da sırep (-7,2%) barady.
Jalpy, vedomstvo málimetinshe, qańtardan naýryzǵa deıingi aralyqta Grýzııaǵa 958 947 sheteldik týrıst keldi. Bul ótken jyldyń dál osyndaı kezeńimen salystyrǵanda 2,2 paıyzǵa artyq.

Týrıstik emes saparlardy eskerer bolsaq, bul kórsetkish 1,3 mıllıon saparlaýshyǵa deıin artady. Bul ótken jylmen salystyrǵanda 1,1 paıyzǵa kóp.

Ótken jyldyń jeltoqsan aıynda Ýrekı, Bahmaro jáne Shekvetılı sııaqty teńiz jáne taý kýrorttarymen tanymal Gýrııa aımaǵynda Qazaqstannyń Qurmetti konsýldyǵynyń saltanatty ashylý rásimi ótken edi.