Qazaqstan Grýzııaǵa eksport kólemin arttyrady
ASTANA. KAZINFORM – Qazaqstan men Grýzııa agroónerkásiptik keshendegi yntymaqtastyqty keńeıtýge nıetti. Bul másele Astanada ótip jatqan RES–2026 alańynda ótken kezdesýde talqylandy.
QR Aýyl sharýashylyǵy mınıstri Aıdarbek Saparov Grýzııanyń Qorshaǵan ortany qorǵaý jáne aýyl sharýashylyǵy mınıstri Davıd Songýlashvılımen kezdesip, ekijaqty saýda-ekonomıkalyq baılanystardy damytý perspektıvalaryn qarastyrdy.
– Biz Grýzııany Ońtústik Kavkazdaǵy mańyzdy ári bolashaǵy zor seriktes retinde baǵalaımyz jáne agroónerkásiptik keshendegi yntymaqtastyqty tereńdetýge úlken múmkindik bar dep sanaımyz. Qazaqstan grýzın naryǵyna astyq pen ony qaıta óńdeý ónimderinen bastap et jáne sút ónimderine deıin básekege qabiletti ónimderdi jetkizýge daıyn. Ótken marketıngtik jyldyń qorytyndysy boıynsha 15,3 mln tonna astyq eksporttaldy, bul sońǵy 20 jyldaǵy rekordtyq kórsetkish, – dedi Aıdarbek Saparov.
Kezdesý barysynda qazaqstandyq bıdaı, un jáne makaron ónimderiniń Grýzııa naryǵyna eksportyn ulǵaıtý máselesi talqylandy. Sonymen qatar veterınarııalyq yntymaqtastyqqa erekshe nazar aýdarylyp, mal men mal ónimderin jetkizýge qatysty sertıfıkattar kelisildi.
Sondaı-aq 2025 jyly Qazaqstannan Grýzııaǵa alǵash ret 500 tonna shoshqa eti ónimderi eksporttalǵany aıtyldy. Taraptar kadr daıarlaý, ǵylymı zertteýler júrgizý jáne agrarlyq sektordy damytý baǵytynda da yntymaqtastyqty nyǵaıtýǵa múddeli ekenin bildirdi.
Óz kezeginde Davıd Songýlashvılı eki el arasyndaǵy áriptestiktiń áleýeti joǵary ekenin atap ótip, saýda-ekonomıkalyq baılanystardy keńeıtýge daıyn ekenin jetkizdi.
Aıta keteıik, Aqmola oblysynda 300 mlrd teńgege astyqty tereń óńdeý zaýyty salynatyny habarlandy.
