Qazaqstan-Grekııa matchy jaıynda bapkerler men fýtbolshylar ne deıdi
ASTANA. KAZINFORM - Búgin fýtboldan Ulttar lıgasy pleı-off satysyndaǵy Qazaqstan jáne Grekııa arasynda match ótedi. Kezdesý jaıynda eki quramanyń bas bapkerleri men oıynshylary pikirin bildirdi.
2024 jylǵy Eýropa chempıonatynyń joldamasy úshin eki qurama 21 naýryzda baq synaıdy.
Bul juptyń jeńimpazy 26 naýryzda taǵy da syrt alańda Grýzııa-Lıýksembýrg jubynyń jeńimpazymen sheberlik baıqasady.
Oıyn 21 naýryzdan 22-ne qaraǵan túni saǵat 00:35–te Qazaqstan jáne Qazsport telearnalarynan tikeleı efırde kórsetiledi.
Kezdesýge nıderlandtyq tóreshiler qazylyq jasaıdy.
«Atalǵan oıynnyń mańyzdy ekenin barlyǵy túsinedi. Olarǵa kóp qysym jasaýdyń qajeti joq. Osyǵan baılanysty Slovenııamen bolǵan oıynmen salystyrǵanda minezimdi azdap ózgerttim. Biz Birikken Arab Ámirliginiń Dýbaı qalasynda ótken oqý-jattyǵý jıynynda kóptegen ózgeris engizip, jattyǵý protsesin rettedik. Aıta ketsem, men oıyn taǵdyryn penaltı arqyly sheshýdi qalamaımyn. Ony óz mansabymda birneshe márte sezindim. Jattyǵý men oıynda penaltı tebý múldem basqa nárse. Bizde ony sátte oryndaı alatyn fýtbolshylar bar. Qalaı bolǵanda da, olardyń psıhologııalyq daıyndyǵyna baılanysty dep oılaımyn. Qaqpashylar týraly aıtatyn bolsaq, bul maqsatta biraz jumys atqaryldy», — dedi Qazaqstan ulttyq quramasynyń bas bapkeri Magomed Adıev.
Al ulttyq quramanyń jartylaı qorǵaýshysy Bahtıer Zaınýtdınov qazaqstandyq jankúıerler qoldaýyn sezinip júrgenin aıtady.
Aldaǵy oıynda jeńiske jetýge bar kúshin salatynyn atap ótti.
«Bizge óz jankúıerlerimiz erekshe qoldaý bildirip keledi. Ony sezinip júrmiz. Aldaǵy oıynda bizge jankúıerler tolyq bolǵan stadıon kedergisin jasaı almaıdy. Kezdesýdi jankúıerler asyǵa kútip júrgeni belgili. Olardan kóptegen hat keledi. Biz óz kúshimizge senemiz. Qarsylas qurama tájirıbeli fýtbolshylar bar. Grekııa — óte myqty qurama. Biz olardan seskenbeımiz», — deıdi ol.
Sondaı-aq, atalǵan quramanyń bas bapkeri Gýstavo Poıet aldaǵy oıyn jaıynda pikir bildirdi.
«Qazaqstan quramasy sońǵy jyldarda úlken serpilis jasady. Olardyń mundaı jetistigi bizdiń quramadan da joǵary boldy. Soǵan qaramastan kezdesý barysynda biz olarǵa sheberligimizdi dáleldeı alamyz degen oıdamyn», — dedi Gýstavo Poıet.
Al Grekııa quramasynyń qaqpashysy Odısseas Vlahodımos aldaǵy oıynda qarsylastan abaı bolý qajettigine toqtaldy.
«Kezdesý barysynda biz qandaı qurama ekenimizdi dáleldeýge tyrysamyz. Bas bapker fýtbolshylarǵa qalaı oınaý qajettigi jóninde aqyl-keńesin berdi. Sol boıynsha óz oıymyzdy júzege asyramyz», — dedi Odısseas Vlahodımos.
