Qazaqstan greenfield-ınvestıtsııa tartýda Ortalyq Azııada kósh bastady
ASTANA. KAZINFORM – Qazaqstan byltyr jańa óndiristerge arnalǵan greenfield-jobalarǵa tartylǵan ınvestıtsııa kólemi boıynsha Ortalyq Azııadaǵy kóshbasshy atandy. El óńirdegi mundaı ınvestıtsııalardyń 89%-yn ózine tartty.
Úkimettiń málimetinshe, bul kórsetkish Memleket basshysynyń 2029 jylǵa qaraı jalpy ishki ónimdi 450 mlrd dollarǵa deıin ulǵaıtý jáne keminde 150 mlrd dollar kóleminde sheteldik ınvestıtsııa tartý jónindegi tapsyrmasyn oryndaý aıasynda júrgizilip jatqan reformalardyń nátıjesi.
Investorlarǵa qolaıly jaǵdaı jasaý úshin Investıtsııalyq shtab qurylyp, sheteldik kompanııalardyń máselelerin jedel sheshý tetigi engizildi. Sondaı-aq quny 60 mln dollardan asatyn iri jobalar úshin zańnamanyń 25 jyl boıy turaqtylyǵyna kepildik beretin Investıtsııalar týraly kelisim mehanızmi iske qosyldy. Qazirgi tańda osyndaı 57 kelisim jasalǵan.
– Byltyr Qazaqstan jańa óndiristerge arnalǵan greenfield-jobalarǵa 19 mlrd dollar kóleminde ınvestıtsııa tartty. Bul – Ortalyq Azııadaǵy jańa óndiristerge baǵyttalǵan óńirishilik ınvestıtsııalardyń 89%-yn quraıdy, – delingen Úkimettiń aqparatynda.
Sonymen qatar jalpy tikeleı sheteldik ınvestıtsııalar aǵyny 14,4%-ǵa ósip, 20,5 mlrd dollarǵa jetti. TShI qurylymynda saýda salasy – 4,8 mlrd dollar, óńdeý ónerkásibi – 4,4 mlrd dollar, al taý-ken óndirý sektory 3,4 mlrd dollar ınvestıtsııa tartqan.
– Qazaqstannyń negizgi bes ınvestory qatarynda Nıderland (4,6 mlrd dollar), Reseı (2,9 mlrd dollar), Qytaı (2,8 mlrd dollar), Birikken Arab Ámirlikteri (1,6 mlrd dollar) jáne Sıngapýr (1,4 mlrd dollar) bar. Olardyń ınvestıtsııalary tehnologııalyq turǵydan kúrdeli ındýstrııalyq jáne ınfraqurylymdyq jobalardy iske asyrýǵa baǵyttalǵan, – dep atap ótti Úkimet.
Aıta keteıik, alty aıda el ekonomıkasyna 9,5 trln teńge ınvestıtsııa salyndy.
