Qazaqstan Gretsııaǵa dándi daqyldardy eksporttaıtyn bolady

ASTANA. QazAqparat - Qazaqstan Gretsııaǵa dándi daqyldardy eksporttap, atalǵan elden záıtún maıyn ımporttaıtyn bolady. QazAqparat bul týraly QR Aýyl sharýashylyǵy mınıstrligine silteme jasap habarlaıdy.

Málimetke sáıkes, tıisti qujatqa eki eldiń aýyl sharýashylyǵy mınıstrleri – Erbol Qarashókeev pen Georgıs Georgantas KGIR – 2022 jahandyq ınvestıtsııalar jónindegi qazaqstandyq dóńgelek ústel otyrysy aıasynda qol qoıdy.

QR Aýyl sharýashylyǵy mınıstrliginiń basshysy otandyq bıdaıdyń turaqty ónimdiligi men joǵary sapaly sıpattamalary Qazaqstannyń astyq pen undy álemdik jetekshi eksporttaýshylardyń biri retinde tanylýyna yqpal etkenin atap ótti.

«Sondaı-aq biz un jáne jarma ónerkásibi ónimderi, et, ósimdik maılary, qaıta óńdelgen jáne organıkalyq ónimderdiń basqa da túrlerin jetkizýdi pysyqtaýǵa daıynbyz. Osy qujatqa qol qoıý elderimizdiń AÓK salasyndaǵy yntymaqtastyǵyn damytýǵa qosymsha serpin beredi dep senemin», - dedi Erbol Qarashókeev.

QR Aýyl sharýashylyǵy mınıstri sonymen qatar grek ınvestorlaryna Qazaqstan aýmaǵynda aýyl sharýashylyǵy shıkizatyn, onyń ishinde et pen sútti, kartopty, qant qyzylshasyn, maıly daqyldardy, jemisterdi jáne taǵy basqalaryn óńdeý boıynsha jobalardy iske asyrýdy usyndy.

Aıta keteıik, Qazaqstan men Gretsııa arasynda saýda kórsetkishteriniń ósýi baıqalady. 2022 jyldyń 8 aıynda AÓK óniminiń taýar aınalymy 2021 jylmen salystyrǵanda 5,5% artyp, 3,8 mln dollardy qurady.

Foto: gov.kz