Qazaqstan Global Firepower áskerı qýat reıtınginde 58-orynda tur
ASTANA. KAZINFORM — Qazaqstan Global Firepower uıymynyń jyl saıynǵy áskerı qýat reıtınginde óz pozıtsııasyn saqtap qaldy.
Álem boıynsha 145 memleket qamtylǵan tizimde elimiz 58-orynǵa ıe boldy. Al Ortalyq Azııa elderi arasynda elimiz jan basyna shaqqandaǵy áskerı shyǵyn kólemi boıynsha birinshi orynda tur.
Global Firepower uıymynyń derekterine sáıkes, Qazaqstannyń áskerı qýat ındeksi (PwrIndx) 1.0433 deńgeıinde baǵalandy. Bul kórsetkish nólge neǵurlym jaqyn bolǵan saıyn, soǵurlym memlekettiń áskerı áleýeti joǵary dep esepteledi.
Álemdik reıtıngte kóshbasshylyq oryndy 0.0741 ındeksimen AQSh saqtap otyr. Ekinshi orynda Reseı (0.0791), úshinshi orynda Qytaı (0.0919) ornalasqan.
Alǵashqy ondyqqa Úndistan (0.1346), Ońtústik Koreıa (0.1642), Frantsııa (0.1798), Japonııa (0.1876), Túrkııa (0.1975), Italııa (0.2211) jáne Brazılııa (0.2374) endi.
Reıtıngtiń eń sońǵy oryndaryn Lıberııa (3.9275), Sýrınam (4.0538), Ortalyq Afrıka Respýblıkasy (4.2381), Belız (4.3602) jáne Býtan (5.7991) ıelendi.
Sonymen qatar, qorǵanys bıýdjeti boıynsha Qazaqstannyń kórsetkishi 5,836 mlrd AQSh dollaryn qurady.
Elimizde halyq sanyna shaqqandaǵy áskerı shyǵyn jylyna bir adamǵa shamamen 284 AQSh dollaryn quraıdy. Bul — Ortalyq Azııadaǵy eń joǵary kórsetkish.
Salystyrmaly túrde alǵanda, Túrikmenstanda bul kórsetkish shamamen 209 dollardy, Ózbekstanda — 162 dollar, Qyrǵyzstanda — 88 dollar, al Tájikstanda 42 dollardan sál asady.
Aıta keteıik, Global Firepower reıtıngti ázirleý barysynda 60-tan astam kórsetkish eskeriledi. Olardyń qatarynda ásker sany, qarjylyq múmkindik, logıstıka, geografııalyq ornalasý, áskerı tehnıkamen qamtylý jáne ekonomıkalyq turaqtylyq bar.
Osyǵan deıin Qazaqstan áskeri qandaı tehnıkamen jabdyqtalǵanyna sholý jasaǵan edik.
