Qazaqstan GISS-2026 sımpozıýmynda avıatsııadaǵy jahandyq bastamalardy qoldady
ASTANA. KAZINFORM — Marrakesh qalasynda (Marokko) ótken Global Implementation Support Symposium 2026 aıasynda Qazaqstan avıatsııa salasyndaǵy halyqaralyq yntymaqtastyqty nyǵaıtýǵa belsendi qatysyp jatyr, dep habarlaıdy Kólik mınıstrliginiń baspasóz qyzmeti.
14–16 sáýir aralyǵynda ótken sımpozıýmǵa álemniń ár elinen avıatsııa salasynyń basshylary, úkimet ókilderi men halyqaralyq uıymdar jınaldy. Іs-sharanyń basty taqyryby — «Óńirlik sheshimder, jahandyq artyqshylyqtar» boldy.
Qazaqstandyq delegatsııany QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva basqardy. Ol sımpozıým barysynda Halyqaralyq azamattyq avıatsııa uıymynyń Jahandyq elshiler baǵdarlamasy aıasynda sóz sóılep, Qazaqstannyń adam kapıtalyn damytý baǵytyndaǵy tájirıbesin tanystyrdy.
Joǵary deńgeıdegi kezdesýge IKAO Keńesiniń Prezıdenti Toshııýkı Onýma men uıymnyń Bas hatshysy Hýan Karlos Salasar, sondaı-aq halyqaralyq sarapshylar qatysty.
Kezdesý barysynda avıatsııa salasyndaǵy kadr daıarlaý, genderlik teńdik, jastardy tartý jáne bilim berý baǵdarlamalaryn damytý máseleleri talqylandy.
— Bul Sımpozıým Halyqaralyq azamattyq avıatsııa uıymynyń 2026-2050 jyldarǵa arnalǵan Uzaq merzimdi strategııalyq josparyn iske asyrýdyń bastapqy núktesi bolsyn. Barsha úshin qaýipsiz, qorǵalǵan jáne turaqty áýe kóligin qamtamasyz etý — bizdiń maqsatymyz ári ortaq jaýapkershiligimiz, — dedi sımpozıýmnyń ashylýynda IKAO Keńesiniń prezıdenti.
Qazaqstan tarapynan usynylǵan bastamalar qatarynda avıatsııalyq mamandyqtardy dáripteý, áıelderdiń rólin arttyrý jáne jastardy salaǵa tartý máseleleri boldy. Búginde eldiń azamattyq avıatsııa salasynda 25 myńǵa jýyq maman jumys isteıdi, olardyń 40 paıyzdan astamy — áıelder.
Sımpozıým aıasynda Qazaqstan ókilderi óńirlik avıatsııalyq qaýipsizdik máselelerine arnalǵan paneldik sessııaǵa da qatysty. Onda qaýipsizdikti qadaǵalaý jáne avıatsııalyq oqıǵalardy tergeý boıynsha óńirlik uıymdardyń róli, sondaı-aq kadr jáne qarjy resýrstarynyń tapshylyǵy sııaqty ózekti máseleler kóterildi.
Saltanat Tompıeva óńirlik yntymaqtastyqtyń tıimdiligi naqty praktıkalyq qadamdarǵa negizdelýi tıis ekenin atap ótti. Onyń aıtýynsha, sarapshylarmen almasý, birlesken aýdıtter jáne tehnıkalyq mıssııalar memleketterge naqty nátıjelerge jyldam qol jetkizýge múmkindik beredi.
Іs-shara qorytyndysy boıynsha qatysýshylar óńirlik tetikterdiń jahandyq avıatsııalyq qaýipsizdik júıesindegi mańyzy artyp kele jatqanyn atap ótti. Qazaqstan óz kezeginde halyqaralyq yntymaqtastyqty odan ári damytýǵa jáne qaýipsiz, turaqty avıatsııalyq júıeni qalyptastyrýǵa daıyn ekenin rastady.
Marrakesh qalasynda (Marokko) ótip jatqan ICAO Global Implementation Support Symposium 2026 aıasynda Qazaqstannyń avıatsııa ákimshiligi (QAÁ) men IKAO Training Services Agreement kelisimin uzartýǵa qol qoıdy.
Bul qadam IKAO-men qoldanystaǵy kelisim aıasynda 2026 jyly QAÁ qyzmetkerlerin oqytý baǵdarlamasyn iske asyrýǵa baǵyttalǵan jáne avıatsııa mamandarynyń biliktiligin arttyrý men kásibı quzyrettilikterin damytýǵa baǵyttalǵan vırtýaldy jáne aýdıtorııalyq oqý kýrstarynan ótýdi kózdeıdi. Osylaısha, 2026 jyly kelisimdi iske asyrý aıasynda oqytý negizgi baǵyttar boıynsha 23 kýrsty qamtıdy, onyń qorytyndysy boıynsha IKAO halyqaralyq sertıfıkattary tabystalady.
Budan buryn Prezıdent Halyqaralyq azamattyq avıatsııa týraly konventsııaǵa qatysty zańǵa qol qoıǵanyn jazdyq.
