Almatyda Ortalyq Azııadaǵy eń iri gımnastıka ortalyǵy salynyp jatyr
ASTANA. KAZINFORM — Memleket basshysy Halyqaralyq gımnastıka federatsııasynyń prezıdenti (FIG) Morınarı Vatanabemen jáne Azııa gımnastıkalyq odaǵynyń (AGU) prezıdenti Abdýlrahman Ál-Shatrımen kezdesti. Bul týraly Aqorda málim etti.
Áńgimelesý barysynda elimizde gımnastıka sporty túrlerin damytý jáne nasıhattaý boıynsha yntymaqtastyq perspektıvasy talqylandy.
Qasym-Jomart Toqaev FIG jáne AGU uıymdarynyń Qazaqstan gımnastıka federatsııasyna kórsetip kele jatqan jan-jaqty qoldaýyn joǵary baǵalady.
— Prezıdent búginde elimizde gımnastıkanyń balalar men jastar arasynda tanymaldylyǵy arta túskenin atap ótti. Kóptegen jergilikti zaldarmen qatar, ulttyq qurama jattyǵatyn jáne halyqaralyq jarystar uıymdastyrylatyn úsh arnaýly keshen jumys isteıdi, — delingen habarlamada.
Budan bólek, Memleket basshysynyń tapsyrmasymen Almaty qalasynda Ortalyq Azııadaǵy eń iri ári biregeı Gımnastıka ortalyǵynyń qurylysy bastaldy.
Qasym-Jomart Toqaev Qazaqstannyń aýqymdy sport is-sharalaryn ótkizýde aıtarlyqtaı tájirıbe jınaǵanyna toqtaldy.
Memleket basshysy elimizdiń sport salasyn damytý jáne iri halyqaralyq dodalardy ótkizý boıynsha birlesken bastamalardy qarastyrýǵa daıyn ekenin rastady.
Morınarı Vatanabe men Abdýlrahman Ál-Shatrı Qazaqstan basshylyǵynyń kásibı jáne buqaralyq sportqa kórsetip otyrǵan qoldaýyna oń baǵa berdi.
Meımandar elimizdiń dańqyn álemdik arenalarda asqaqtatyp júrgen qazaqstandyq atletterdiń jetistigine erekshe nazar aýdardy.
Memleket basshysy Qazaqstanda jáne álemde gımnastıka sportyn damytýǵa sińirgen eńbegi úshin Halyqaralyq gımnastıka federatsııasynyń prezıdenti Morınarı Vatanabeni I dárejeli «Dostyq» ordenimen, al Azııa gımnastıkalyq odaǵynyń prezıdenti Abdýlrahman Ál-Shatrıdi II dárejeli «Dostyq» ordenimen marapattady.
Aıta keteıik, Prezıdent birqatar aktiniń kúshin joıatyn Jarlyqqa qol qoıdy.
