Qazaqstan ǵylymı-zertteý men tájirıbelik-konstrýktorlyq jumystarǵa JІÓ-niń 0,16 paıyzyn ǵana jumsaıdy

ASTANA. KAZINFORM – QR Prezıdentiniń janyndaǵy Ulttyq ǵylym akademııasynyń vıtse-prezıdenti Abaı Serikqanov Qazaqstan ǵylymı-zertteý jáne tájirıbelik-konstrýktorlyq jumystarǵa JІÓ-niń 0,16%-yn ǵana jumsap otyrǵanyn másele etip kóterdi.

- Qazaqstandaǵy ǵylymı-zertteý jáne tájirıbelik-konstrýktorlyq jumystarǵa jumsalatyn ishki shyǵystardyń deńgeıi jalpy ishki ónimniń 0,16 paıyzyna ǵana teń. Bul bizdiń kórsetkish damyǵan ekonomıkalardyń, tipti Reseı men Belarýs sııaqty elderdiń, Eýropalyq odaq elderiniń kórsetkishterinen tómen degendi bildiredi. Memleket áli kúnge deıin ǵylymı-zertteý jáne tájirıbelik-konstrýktorlyq jumystardyń negizgi ınvestory bolyp otyr. Barlyq shyǵynnyń 77%-ǵa jýyǵy bıýdjetten alynady. Al kásiporyndar salǵan menshikti qarajattyń úlesi 16% ǵana. Bankter bólgen qaryz úlesi nebári 0,1% ekenin aıttyq, - dedi ol Senattaǵy kezdesýde.

Onyń sózinshe, 2024 jyly Ǵylymı-zertteý jáne tájirıbelik-konstrýktorlyq jumystarǵa berilgen ishki shyǵyndardyń 65%-y qoldanbaly zertteýlerge, 27%-y irgeli zertteýlerge, tek 7,3%-y ǵana tájirıbelik-konstrýktorlyq ázirlemelerge tıesili bolǵan.

Eske salsaq, naýryz aıynda Almatydaǵy Ulttyq ǵylym akademııasy taratylatyny málim bolǵan edi.