Qazaqstan ǵylymdy basqarýdyń jańa úlgisine kóshedi

Qujatty Ǵylym jáne joǵary bilim mınıstrligi, Qazaqstan Respýblıkasy Prezıdentiniń janyndaǵy Ulttyq ǵylym akademııasy salalyq memlekettik organdarmen, jergilikti atqarýshy organdarmen jáne basqa da uıymdarmen birlesip ázirlegen.

Joba ǵylymdy basqarý júıesin jetildirý, kadrlyq áleýetti arttyrý, salalyq jáne óńirlik ǵylymdy damytý, sondaı-aq birtutas ınnovatsııalyq ekojúıe qalyptastyrý baǵyttaryn qamtıtyn 72 is-sharadan turady.

— Ǵylymı qyzmetti basqarý júıesin jańǵyrtýǵa aıryqsha mán berilgen. Ulttyq ǵylymı basymdyqtardy aıqyndaýdan bastap zertteý nátıjelerin ekonomıkaǵa engizýge deıingi barlyq úderisti qamtıtyn birtutas basqarý tetigin qalyptastyrý usynyldy. Ǵylym salasyn basqarýdyń jańa úlgisinde basym baǵyttardy tórt deńgeı boıynsha aıqyndaý kózdeledi. Birinshi deńgeıge ulttyq qaýipsizdik pen tehnologııalyq derbestik úshin asa mańyzdy strategııalyq jobalar jatady. Ekinshi deńgeı tehnologııalyq serpilis jasaýǵa áleýeti bar perspektıvaly baǵyttardy qamtıdy. Úshinshi deńgeıge irgeli pánaralyq jáne ınjenerlik zertteýler engiziledi. Tórtinshi deńgeı ǵylymı kadrlardy daıarlaýǵa, ınfraqurylymdy damytýǵa jáne zertteýlerdiń ınstıtýtsıonaldyq negizin nyǵaıtýǵa baǵyttalǵan, — dep habarlady Úkimettiń baspasóz qyzmeti.

Josparda ǵylymnyń naqty ekonomıkamen jáne óńirlermen baılanysyn kúsheıtýge de basymdyq berilgen. Ǵylym qalalary men ǵylymı-tehnologııalyq parkterdi damytýdyń keshendi úlgisin qalyptastyrý usynyldy.

Keńes barysynda Premer-mınıstrdiń orynbasaryna Innovatsııalardy damytý tujyrymdamasynyń jobasy da tanystyryldy.

Aıda Balaeva memlekettik qoldaý tek ǵylymı jáne praktıkalyq qundylyǵy bar, óndiriske engizý jáne kommertsııalandyrý múmkindigi naqty jobalarǵa ǵana kórsetilýge tıis ekenin atap ótti. Sonymen qatar ǵylymı jobalardy tekserý qorytyndylary boıynsha ashyq eseptilikti qamtamasyz etý, bıýdjet qarajatyn qaıtarý, anyqtalǵan zań buzýshylyqtarǵa jaýapty tulǵalardy jaýapkershilikke tartý jáne naqty ekonomıkaǵa qajetti perspektıvaly ázirlemelerdiń biryńǵaı tizilimin qalyptastyrý máselelerine nazar aýdardy.

Sondaı-aq keńeste Ulttyq ǵylym akademııasynyń negizgi bastamalary tanystyryldy. Akademııa basqarmasynyń prezıdenti Aqylbek Kúrishbaevtyń aıtýynsha, mamandar ǵylymnyń basym baǵyttaryn aıqyndaýdyń jańa ádistemesin ázirlegen. Ol ǵylymı kún tártibin memlekettiń strategııalyq mindetteri, ekonomıkanyń qajettilikteri jáne álemdik ǵylymı-tehnologııalyq úrdister negizinde qalyptastyrýdy kózdeıdi.

Akademııanyń ǵylymdy strategııalyq damytý jónindegi keshendi jospar jobasyna engizilgen segiz pánaralyq flagmandyq ǵylymı jobasyn júzege asyrýǵa da erekshe nazar aýdaryldy.

Budan bólek, Koreıanyń KISTI ınstıtýtymen birlesip qurylǵan SilkNet ortalyǵynyń jumysy týraly baıandaldy. Atalǵan ortalyq memlekettik ǵylymı-tehnologııalyq saıasatty boljaý men saraptamalyq turǵydan súıemeldeýdiń negizgi alańyna aınalmaq.

— Mańyzdy baǵyttardyń biri — Qytaı ǵylym akademııasymen birlesip júzege asyrylatyn DeepBas jobasy. Ol keńistik pen ýaqyt derekterine negizdelgen jasandy ıntellekt tehnologııalaryn paıdalana otyryp, sý resýrstaryn basqarýǵa baǵyttalǵan. Jobany 2027 jyly elimizdiń úsh iri sý alabynda pılottyq rejımde iske qosyp, keıin onyń tehnologııalaryn basqa salalarǵa keńinen engizý josparlanyp otyr, — delingen habarlamada.

Keńes qorytyndysynda Aıda Balaeva ǵylymdy damytý jáne ınnovatsııalardy damytý josparlaryn bir qujatqa biriktirýdi, sondaı-aq ony talqylaý barysynda aıtylǵan barlyq tujyrymdamalyq eskertýlerdi eskere otyryp pysyqtaýdy tapsyrdy.

Sonymen birge Premer-mınıstrdiń orynbasary ǵylymı-zertteý ınstıtýttaryn tolyq túgendeý, olardyń kadrlyq jáne ǵylymı áleýetin baǵalaý, sondaı-aq múmkindik bar jerlerde ǵylymı ınfraqurylymdy qalpyna keltirý qajettigin atap ótti.

Eske salaıyq, buǵan deıin Qazaqstanda Kaspıı máselelerin zertteıtin ǵylymı fılıal ashý usynylǵanyn habarlaǵanbyz.