Qazaqstan ǵylym akademııasyna 80 jyl: arhıv qujattaryndaǵy otandyq ǵylym tarıhy
ASTANA. KAZINFORM – Qazaqstan Ǵylym akademııasynyń qurylǵanyna 80 jyl tolýyna oraı Qazaqstan Respýblıkasy Prezıdentiniń Arhıvi elimizdegi akademııalyq ǵylymnyń qalyptasýy men damýyna arnalǵan tarıhı-qujattyq kórmeni usyndy.
Oǵan 1932 jyldan 2025 jylǵa deıingi kezeńdi qamtıtyn 70-ten astam fotosýret pen arhıvtik qujat endi.
Kórmede Qazaq KSR Ǵylym akademııasynyń qurylýyna jáne onyń tuńǵysh prezıdenti – kórnekti ǵalym Qanysh Imantaıuly Sátbaevtyń qyzmetine qatysty qujattarǵa erekshe oryn berilgen. Ekspozıtsııada memlekettik organdardyń qaýlylary men hattamalary, ǵalymdar men memleket qaıratkerleriniń hattary men baıandamalary, ǵylymı ınstıtýttardyń damýyna, zertteýlerdiń jańa baǵyttarynyń qalyptasýyna jáne qazaqstandyq ǵalymdardyń eldiń ekonomıkalyq jáne qoǵamdyq damýyna qosqan úlesine qatysty materıaldar usynylǵan.
Kórmeniń jekelegen bólimderi HH ǵasyrdyń ekinshi jartysynda respýblıkanyń ǵylymı áleýetiniń nyǵaıýyna, geologııa, energetıka, ıadrolyq fızıka, aýyl sharýashylyǵy jáne gýmanıtarlyq ǵylymdardyń damýyna, sondaı-aq táýelsizdik jyldaryndaǵy Qazaqstannyń ǵylymı júıesindegi ózgeristerge arnalǵan.
Ekspozıtsııaǵa Qazaqstan Respýblıkasy Prezıdentiniń Arhıvi qorlaryndaǵy, sondaı-aq Qazaqstan Respýblıkasy Ǵylym akademııasynyń vedomstvolyq arhıvindegi qujattar men fotomaterıaldar engizildi.
Kórme arhıvtik qujattardyń túpnusqalary arqyly otandyq akademııalyq ǵylymnyń qalyptasýy men damýynyń negizgi kezeńderin zerdeleýge, kórnekti ǵalymdardyń Qazaqstannyń ǵylymı mektebiniń qalyptasýyna qosqan úlesin kórsetýge jáne ǵylymnyń eldiń tarıhı ári qazirgi damýyndaǵy rólin paıymdaýǵa múmkindik beredi.
Kórme Qazaqstan ǵylym akademııasynyń alańynda ashyldy.
Ekspozıtsııa ǵylymı jáne akademııalyq qaýymdastyq ókilderine, tarıhshylar men arhıvısterge, stýdentter men zertteýshilerge, sondaı-aq Qazaqstan tarıhy men otandyq ǵylymnyń damý tarıhyna qyzyǵýshylyq tanytatyn keń aýdıtorııanyń nazaryna usynylady.
