Qazaqstan Germanııany munaımen qamtamasyz etip otyrǵan negizgi 4 memlekettiń biri - Prezıdent

ASTANA. QazAqparat – Qazaqstan Germanııany munaımen qamtamasyz etip otyrǵan negizgi 4 memlekettiń biri. Bul týraly Aqordada Germanııa Prezıdenti Frank-Valter Shtaınmaıermen kelissózderden keıingi BAQ ókilderine birlesken málimdeme barysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Taǵy bir asa mańyzdy sala – mádenı-gýmanıtarlyq baılanys. Elimizde nemis ultynyń 226 myń ókili ómir súredi. Olar Qazaqstandy órkendetýge eleýli úles qosyp kele jatyr. Germanııada 1 mln-nan astam burynǵy otandastarymyz turady. Bul – halyqtarymyz arasyndaǵy dostyqty nyǵaıta túsetin altyn kópir. Biz osy saladaǵy yqpaldastyqty tereńdetýge nıettimiz», - dedi Prezıdent.

Sonymen qatar, Memleket basshysy Germanııa Prezıdentimen saýda-ekonomıkalyq qatynastardy damytý joldaryn talqylaǵandyqtaryn aıtty.

«Qazaqstan – Germanııanyń Ortalyq Azııadaǵy negizgi ekonomıkalyq áriptesi. Germanııanyń Ortalyq Azııa elderimen alys-berisiniń 83 paıyzy bizdiń elge tıesili. Byltyr ekijaqty saýda-sattyq shamamen 10 mlrd dollar boldy. Qazaqstan Germanııanyń basty 50 ekonomıkalyq seriktesiniń qataryna kiredi. Sondaı-aq, osy eldi munaımen qamtamamsyz etip otyrǵan negizgi 4 memlekettiń biri sanalady. Biz ekonomıkalyq yntymaqtastyqtyń jańa kezeńine qadam bastyq. Ózara tıimdi qarym-qatynasty nyǵaıtý óte mańyzdy. Sol úshin Prezıdent Shtaınmaıerge eki eldiń múddesine saı keletin birqatar naqty usynys aıttym», - dedi Qasym-Jomart Toqaev.