Qazaqstan Germanııamen joǵary tehnologııalar salasyndaǵy yntymaqtastyqty keńeıtýge nıetti
NUR-SULTAN. QazAqparat - Qazaqstan Germanııamen joǵary tehnologııalar salasyndaǵy yntymaqtastyqty keńeıtýge nıetti. Bul jaıynda búgin Qazaqstannyń Germanııadaǵy Tótenshe jáne Ókiletti Elshisi Bolat Núsipov aıtty, dep habarlaıdy QazAqparat tilshisi.
«Qazaqstanda nemis kapıtaly salynǵan 900-den astam birlesken kásiporyn jumys isteıdi. Olardyń arasynda iri kompanııalarmen qatar shaǵyn jáne orta bıznes ókildikteri de bar. Bul biz úshin óte mańyzdy. Sebebi nemis ekonomıkasynyń 98 paıyzdan astamyn shaǵyn jáne orta bıznes kásiporyndary quraıdy», - dedi ol elordada ótken Berlın eýrazııalyq klýbynyń 26-otyrysynda.
Onyń aıtýynsha, nemis kapıtaly salynǵan Qazaqstandaǵy birlesken kásiporyndar qurylys, saýda, ónerkásip óndirisi, ken oryndaryn ıgerý syndy salalarda jumys istep jatyr.
«Qazirgi ýaqytta tsıfrlandyrý men kommýnaldyq sharýashylyq jáne basqa da baǵyttarda jumys júrip jatyr. Qazaqstan ónerkásip pen joǵary tehnologııalar salasyndaǵy qazaqstandyq-germanııalyq yntymaqtastyqty keńeıtýge múddeli. Bizdiń elimiz óńdeý ónerkásibi men shıkizattyq emes sektordy damytýǵa salynǵan ınvestıtsııany qup kóredi», - dedi B.Núsipov. 
Aıta keteıik, Berlın eýrazııalyq klýby 2012 jyly QR Tuńǵysh Prezıdenti - Elbasy N.Nazarbaev pen Germanııanyń burynǵy vıtse-kantsleri, Syrtqy ister mınıstri H-D.Gensherdiń bastamasymen qurylǵan bolatyn. Osy ýaqytqa deıin klýb otyrystary kezek-kezegimen elorda, Brıýssel jáne Berlın qalalarynda ótken.
