Qazaqstan Germanııamen tehnologııalyq kooperatsııany jańa deńgeıge shyǵarýdy kózdeıdi

Qazaqstan Respýblıkasynyń Premer-mınıstri Oljas Bektenov Germanııanyń federaldy ekonomıka jáne energetıka mınıstri Katerına Raıhemen kezdesti.

Jıynda ekonomıka, ınvestıtsııa, ónerkásip, energetıka, kólik-logıstıka jáne asa mańyzdy mıneraldar salalaryndaǵy yntymaqtastyqty odan ári damytý máseleleri talqylandy.

— Qazaqstan úshin Germanııa Eýropalyq Odaqtaǵy negizgi saýda-ekonomıkalyq jáne ınvestıtsııalyq seriktesterdiń biri sanalady. Qazaqstan Prezıdenti Qasym-Jomart Kemeluly Toqaev Germanııamen yntymaqtastyqqa úlken mán beredi. 2025 jyly ózara saýda kólemi $4,4 mlrd-qa jetip, ótken jylmen salystyrǵanda 9,5%-ǵa artty. Aldaǵy kezeńdedegi basty mindetimiz — eki el arasyndaǵy dástúrli saýda-ınvestıtsııalyq yntymaqtastyqty neǵurlym damyǵan ónerkásiptik jáne tehnologııalyq kooperatsııaǵa aınaldyrýdy qamtamasyz etý. Biz óndiristi lokalızatsııalaý, tehnologııalar transferi jáne joǵary bilikti kadrlar daıarlaý arqyly ónerkásip kooperatsııasyn jańa deńgeıge shyǵarýǵa múddelimiz, — dep atap ótti Premer-mınıstr Oljas Bektenov.

Bul baǵytta CLAAS jáne Horsch kompanııalarynyń Qazaqstandaǵy aýyl sharýashylyǵy mashınasyn jasaý salasyndaǵy tájirıbesi atap ótildi, bul óndiristi kezeń-kezeńimen lokalızatsııalaý modeliniń tıimdiligin kórsetti. Atalǵan model ónerkásiptiń basqa salalaryna da keńinen engizilýi múmkin.

Germanııanyń federaldy ekonomıka jáne energetıka mınıstri Katerına Raıhe Qazaqstannyń damý serpinine oń baǵa berip, ekijaqty ekonomıkalyq yntymaqtastyqty keńeıtýdiń eleýli áleýeti baryn atap ótti. Germanııa tarapy ózara qyzyǵýshylyq týdyratyn baǵyttar boıynsha Qazaqstanmen praktıkalyq ózara is-qımyldy odan ári damytýǵa múddeli ekenderin bildirdi.

— Bizdiń elderimizdi uzaq jyldarǵa sozylǵan berik ári senimdi yntymaqtastyq baılanystyrady. Saýdany ǵana emes, ónerkásiptik kooperatsııany da damytý, Qazaqstanda jańa óndirister ashý mańyzdy. Germanııalyq kompanııalar Qazaqstan ekonomıkasyna belsendi túrde ınvestıtsııa salyp keledi, alaıda men bul áli de múmkindikterdiń shegi emes ekenine senimdimin. Bizdiń ózara is-qımylymyzdyń áleýeti áldeqaıda keń, sondyqtan eki eldiń ekonomıkasy men memleketterdiń múddesi úshin budan da aýqymdy nátıjelerge qol jetkize alamyz. Búginde Qazaqstan óńirdegi jetekshi ekonomıka bolyp sanalady. Qazaqstannyń damý joly shynymen de erekshe áser qaldyrady. Dástúrli ónerkásippen qatar, sizder jasandy ıntellektini damytýǵa, tsıfrlandyrýǵa jáne tsıfrlyq memleketti qalyptastyrýǵa da erekshe kóńil bólip otyrsyzdar. Bizdiń seriktestigimiz kóptegen baǵytty qamtıdy, — dep atap ótti Katerına Raıhe.

Kezdesý qorytyndysy boıynsha taraptar ınvestıtsııalyq yntymaqtastyqty keńeıtý jáne Qazaqstan men Germanııa arasynda jańa jobalardy iske qosý jónindegi birlesken jumysty jalǵastyrýǵa daıyn ekenderin rastady.

Aıta keteıik, 2026 jylǵy qańtar-sáýirde Qazaqstan men Germanııa arasyndaǵy saýda kólemi $1,4 mlrd-qa jetti, bul 2025 jylǵy kórsetkishten 5,9%-ǵa artyq. 2005 jyldan beri Qazaqstanǵa shamamen $7,8 mlrd german ınvestıtsııasy tartyldy. Ótken jyly Germanııadan ınvestıtsııa 28,5%-ǵa ósip, $700 mln-dy qurady. Elimizde german kapıtalynyń qatysýymen 1100-den astam jumys istep turǵan kásiporyn bar, 23 birlesken ınvestıtsııalyq joba júzege asyrylyp jatyr.

Budan buryn Germanııa kompanııasy Qazaqstannyń kómir jobalaryna qatysýǵa qyzyǵýshylyq tanytqanyn jazdyq.