Qazaqstannyń Germanııadan asyl tuqymdy iri qara malyn jetkizýdegi maqsaty ne
ASTANA. KAZINFORM – Qazaqstannyń Sútti jáne aralas tuqymdy mal sharýashylyǵy qaýymdastyǵy Germanııanyń Masterrind GmbH kompanııasymen yntymaqtastyq týraly memorandýmǵa qol qoıdy. Qujat asyl tuqymdy iri qara mal jetkizýge jáne otandyq sútti mal sharýashylyǵynyń genetıkalyq áleýetin arttyrýǵa baǵyttalǵan.
QR Aýyl sharýashylyǵy mınıstrligi baspasóz qyzmetiniń habarlaýynsha, kelisim Germanııanyń Gannover qalasynda ótken EuroTier 2026 halyqaralyq kórmesi aıasynda jasaldy.
Taraptar joǵary ónimdi asyl tuqymdy mal jetkizý, Qazaqstandaǵy mal basynyń genetıkalyq sapasyn jaqsartý jáne sút óndirisiniń ónimdiligin arttyrý baǵytynda uzaq merzimdi áriptestik ornatýdy kózdep otyr.
Yntymaqtastyqtyń basym baǵyttarynyń biri – qazaqstandyq aýyl sharýashylyǵy taýaryn óndirýshiler úshin asyl tuqymdy maldy tıimdi sharttarmen jetkizý tetikterin jetildirý. Bul rette satyp alynatyn maldyń qunyn ońtaılandyrý múmkindikteri de qarastyrylady.
Sheteldik asyl tuqymdy uıymdarmen tikeleı áriptestik ornatý otandyq sharýashylyqtardyń sapaly genetıkalyq qorǵa qol jetkizýine múmkindik beredi. Sondaı-aq selektsııalyq-asyl tuqymdyq jumystyń tıimdiligin arttyrýǵa jol ashady.
Qazir elimizde 2026–2030 jyldarǵa arnalǵan mal sharýashylyǵyn damytý jónindegi keshendi jospar iske asyrylyp jatyr. Qujatta asyl tuqymdy mal sharýashylyǵyn órkendetý, aýyl sharýashylyǵy janýarlarynyń genetıkalyq áleýetin arttyrý jáne mal sharýashylyǵy ónimderiniń kólemin ulǵaıtý sharalary qamtylǵan.
-Jospar aıasynda sútti mal sharýashylyǵyn damytýǵa erekshe mán berilip otyr. Atap aıtqanda, mal ónimdiligin arttyrý, selektsııalyq jumystyń tásilderin jetildirý jáne tól ósirýdiń zamanaýı tehnologııalaryn engizý kózdelgen. Halyqaralyq áriptestikti keńeıtý otandyq asyl tuqymdy mal bazasyn damytýǵa jáne Qazaqstannyń sútti mal sharýashylyǵy salasyndaǵy básekege qabilettiligin arttyrýǵa yqpal etedi,-delingen habarlamada.
Osyǵan deıin Aýstralııadan Qazaqstanǵa 250 asyl tuqymdy iri qara jetkiziletini týraly jazdyq.