Qazaqstan Germanııa kompanııalaryn tsıfrlyq tehnologııalarǵa ınvestıtsııa salýǵa shaqyrdy
ASTANA. KAZINFORM — Qazaqstan men Germanııanyń tsıfrlyq ınnovatsııa jáne jasandy ıntellekt salasyndaǵy seriktestigin jolǵa qoıý taǵy bir basymdyq retinde ataldy, dep habarlaıdy Aqordanyń baspasóz qyzmeti.
— Biz germanııalyq kompanııalardy óz áleýetin derekter óńdeý ortalyǵyna, energııa tıimdiligine qatysty tehnologııalarǵa, «bultty» ınfraqurylym» jáne kıberqaýipsizdik salalaryna jumyldyrýǵa shaqyramyz. Taǵy bir perspektıvti baǵyt — qarjy tehnologııalary. Qazaqstanda tsıfrlyq qarjy ekojúıesi joǵary deńgeıde damyǵan. Onyń aıasynda áýeli ishki naryqqa ozyq tólem júıeleri men tokenızatsııa tehnologııasyn usynyp, keıin ony tutas aımaqqa taratýǵa bolady, — dedi Memleket basshysy.
Qasym-Jomart Toqaevtyń pikirinshe, Qazaqstan ekonomıkasyna nemis qarjy sektoryn keńinen tartatyn yntymaqtastyqtyń mańyzdy baǵyty — Alatau City qalasy.
— Ortalyq Azııadaǵy alǵashqy «aqyldy qala» áýel bastan tsıfrlyq dáýirdiń barlyq talaptaryn saqtaı otyryp jobalandy. Ol nemis kapıtaly men Qazaqstannyń ınvestıtsııalyq múmkindikterin toǵystyratyn kópir bola alady. Alatau City búkil Eýrazııadaǵy talanttardy, tehnologııa men bıznesti tartatyn jańa ortalyqqa aınalatynyna senimdimin, — dedi Prezıdent.
Memleket basshysy sózin qoryta kele, Qazaqstan men Germanııa joǵary deńgeıdegi saıası dıalogqa arqa súıep, qarjy, tehnologııa jáne ınvestıtsııa salalarynda anaǵurlym tıimdi seriktestikti jolǵa qoıa alatynyna nazar aýdardy. Basty maqsat — jaı ǵana kapıtal aǵynyn arttyrý emes, jańa salalar men ósim baǵyttaryn birge qalyptastyrý. Prezıdent Qazaqstan tarapy aldaǵy ýaqytta da ınvestorlarǵa qolaıly ári erejeleri túsinikti ortany qamtamasyz etip, olardyń quqyqtaryn qorǵaıtynyn jáne strategııalyq mańyzdy jobalarǵa qoldaý kórsete beretinin rastady.
Іs-shara barysynda Germanııa ekonomıkasy Shyǵys komıtetiniń atqarýshy dırektory Mıhael Harms, Germanııa saýda-ónerkásip palatasynyń (DIHK) basqarýshy dırektory Elena Melnıkov, Germanııa ónerkásibi federaldyq odaǵynyń (BDI) basqarma múshesi Volfgang Nıdermark, German Water Partnership bas dırektory Borıs Graıfeneder, KfW tobynyń basqarma múshesi Melanı Ker, Deutsche Bank AG basqarma múshesi Aleksandr fon tsýr Mıýlen, Euler Hermes AG basqarma múshesi Edna Shene, AKA Ausfuhrkredit-Gesellschaft mbH basqarýshy dırektory Mark Venchık sóz sóıledi.
Osyǵan deıin Prezıdent Germanııanyń ekonomıkalyq qaýymdastyqtary men qarjy ınstıtýttary jetekshilerimen kezdeskenin jazǵanbyz.
Sonymen qatar Toqaev Qazaq-german ınvestıtsııa-qarjy platformasyn qurýdy usyndy.
