Qazaqstan-Germanııa ınvestıtsııalyq-ónerkásip bastamasyn qolǵa alýǵa ázir - Prezıdent
ASTANA. KAZINFORM – Qasym-Jomart Toqaev eki eldiń qarym-qatynasyn Ortalyq Azııa men Eýropa arasyndaǵy ekonomıkalyq baılanystardy nyǵaıtatyn kópirge balady, dep jazdy Aqorda.
Prezıdenttiń pikirinshe, ónerkásip kooperatsııasy – qazaq-german seriktestiginiń mańyzdy baǵyttarynyń biri. Búginde ortaq portfelde jalpy quny 54 mıllıard dollardan asatyn 40 ınvestıtsııalyq bastama bar. Onyń ishinde 21 joba júzege asqan.
Qasym-Jomart Toqaev CLAAS, Horsch, Amazonen-Werke jáne Knauf sekildi kompanııalarmen tabysty yntymaqtastyq jolǵa qoıylǵanyn jetkizdi. Sońǵy bes jylda CLAAS kompanııasy Qazaqstanda 2100-den asa aýyl sharýashylyǵy tehnıkasyn shyǵarǵan.
– Oraıly sátti paıdalanyp, ónerkásip salasyndaǵy seriktestigimiz ekijaqty úderiske aınalyp kele jatqanyn aıtqym keledi. Ony Qazaqstannan Germanııaǵa ónerkásip taýarlarynyń eksporty artqanynan ańǵaramyz. Máselen, osy sapar barysynda otandyq mashına jasaý salasynyń ónimderin, sonyń ishinde nemis qural-jabdyǵyn qoldaný arqyly shyǵarylǵan temirjol kóligi dóńgelegin Germanııa naryǵyna jetkizý jónindegi ýaǵdalastyqqa qol jetkizildi, – dedi Prezıdent.
Qasym-Jomart Toqaev Qazaqstan germanııalyq kompanııalarmen avtomattandyrý, stanok, ónerkásipke arnalǵan robotty tehnıka, mashına jasaý, ozyq óndiris jáne úderisti tsıfrlandyrý salalarynda yntymaqtastyq aıasyn keńeıtýge daıyn ekenin málimdedi.
– Bul mysaldar ekonomıkalyq baılanystarymyz aldaǵy ýaqytta qaı baǵytta damıtynyn kórsetedi. Jekelegen tabysty jobalarmen shektelmeı, ónerkásip salasyndaǵy júıeli seriktestikke kóshkenimiz jón. Elimiz osy maqsatta Qazaqstan-Germanııa ınvestıtsııalyq-ónerkásip bastamasyn qolǵa alýǵa ázir. Onyń negizinde úzdik jobalardyń biryńǵaı tizimi jasaqtalady. Maqsatymyz aıqyn: Qazaqstanda jańa salalardyń paıda bolýyna septigin tıgizetin, kommertsııalyq turǵydan ómirsheń jobalardy iriktep alý, nemis tehnologııasy men bilimin meńgerý, óńirlik jáne álemdik naryqta básekege qabiletti ónim túrlerin shyǵarý. Bul rette nemistiń Mittelstand, ıaǵnı orta bıznes kásiporyndary aıryqsha ról atqara alady, – dedi Prezıdent.
Aıta keteıik, Qasym-Jomart Toqaev pen Frank-Valter Shtaınmaıer Birlesken deklaratsııa qabyldady.
