Qazaqstan geologııa salasynda Fınlıandııamen birlesken joba ázirlep jatyr

ASTANA. KAZINFORM – Geologııa salasynda tájirıbe almasý jáne taý-ken metallýrgııa keshenin damytý maqsatynda elimiz Fınlıandııa jáne Qytaıdyń halyqaralyq geologııalyq qyzmetimen yntymaqtastyqty nyǵaıtyp jatyr. Tolyǵyraq Ulttyq geologııalyq qyzmet AQ basqarma tóraǵasy Erlan Ǵalıev aıtyp berdi.

– Biz Fınlıandııamen geologııalyq qyzmet pen derekter bazasyn tsıfrlandyrý jáne júıeleý salasynda birlesken jobany qolǵa aldyq. Negizgi tsıfrlandyrý jumysyn ózimiz júrgizip jatyrmyz, alaıda derekterdi ári qaraı qurylymdaý jáne júıeleý úshin bıyl Fınlıandııa mamandaryn tartýdy josparlap otyrmyz. Olarda álemdegi jetekshi geologııalyq qyzmetke ıe. Fınlıandııanyń Afrıka, Azııa jáne Ońtústik Amerıkada mol halyqaralyq tájirıbesi bar. Bul jumysty Qazaqstan qarjysy esebinen emes, syrtqy qarjylandyrý esebinen atqaryp jatyrmyz, – dedi Erlan Ǵalıev elordada ótken 15-shi halyqaralyq taý-ken metallýrgııa kongresinde.

Onyń aıtýynsha, elimizdiń biryńǵaı jer qoınaýyn paıdalaný portalyn ázirleýde Fınlıandııanyń tájirıbesi mańyzdy ról atqarǵan. Platforma jasaýda fın ınterfeısi men bıznes-protsesterdi qurý logıkasynyń elementteri qoldanylǵan.

- Qytaı da Qazaqstannyń mańyzdy seriktesi. Ekijaqty yntymaqtastyq aıasynda shekara mańyndaǵy aımaqta uzaq merzimdi joba júzege asyrylyp jatyr. Eki el shekarasyndaǵy nysandardyń geologııalyq áleýetin zerdeleý sheńberinde iske asyp otyr. Jobany Ónerkásip jáne qurylys mınıstrligine qarasty Geologııa komıteti basqarady, - deıdi ol.

Buǵan deıin habarlaǵanymyzdaı, Quıryqtykól ken ornynda barlaý jumystary aıaqtaldy. 

Aıta keteıik, Qazaqstan altyn qory boıynsha TOP-20 eldiń qataryna kirdi. 

Sondaı-aq jaqyn arada taý-ken kesheni salasynda 3,5 trln teńgege 5 ınvestıtsııalyq joba iske qosylady dep josparlanyp otyr. 

Búgin elordada halyqaralyq taý-ken metallýrgııa kongresi ótti. Oǵan álemniń 20 elinen 1300 delegat qatysty.