Qazaqstan genderlik teńdik boıynsha 146 eldiń ishinde 32-orynda
ALMATY. QazAqparat - Búgingi tańda Qazaqstan genderlik teńdik boıynsha 146 eldiń ishinde 32-orynda tur. Áıelderdiń memlekettik deńgeıde sheshim shyǵarý múmkindigi jyl sanap artyp keledi.
Máselen, QR Parlamenti Májilisinde 28 depýtat áıel bar, Úkimette - 4. Bul týraly Almatyda ótken «Áıelder saıasatta jáne ýaqytsha arnaıy sharalar» atty semınarda QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Mahabbat Bekbosynova málim etti.
Onyń aıtýynsha, Qazaqstanda oblys ákimderi arasynda birde-bir áıel joq. Oblystyq máslıhattardaǵy áıelderdiń úlesi 12 paıyzdan aspaıdy. Memlekettik qyzmettegi áıelderdiń 10 paıyzy ǵana saıası qyzmetterge taǵaıyndalady.
M.Bekbosynovanyń atap kórsetkenindeı, Qazaqstan BUU-nyń Áıelderge qatysty kemsitýshiliktiń barlyq nysandaryn joıý týraly konventsııasyn ratıfıkatsııalady. 2016 jylǵa deıin genderlik saıasatty damytýǵa arnalǵan is-sharalardyń keshendi jospary jasaldy.
Osynyń aıasynda Qazaqstanda «Áıelder men erlerdiń teń quqyqtary týraly» jáne «Turmystyq zorlyq-zombylyqtyń aldyn alý týraly» zańdar qabyldandy.
