Qazaqstan genderlik saıasat júrgizýge daıyn - Májilis depýtaty
ASTANA. Jeltoqsannyń 11-i. QazAqparat /Aıdar Ospanalıev/ - Qazaqstan erler men áıelderdiń teń quqyqtaryn jáne teń múmkindikterin qamtamasyz etýge memlekettiń kepil bolatyndyǵyna jáne turmystyq zábir kórsetýge qatysty zańdardyń qabyldanýyna oraı elde genderlik saıasat júrgizýge tolyq daıyn.
Búgin Astanada «Áıelderdiń qoǵamdaǵy saıası múmkindikteri - genderlik demokratııanyń ustanymdary, problemalar men perspektıva» atty taqyrypta ótken respýblıkalyq konferentsııa barysynda Májilis depýtaty Aıtkúl Samaqova osylaı málim etti, dep habarlaıdy QazAqparat.
Onyń aıtýynsha, kelesi jyly elimiz Eýropadaǵy qaýipsizdik jáne yntymaqtastyq uıymyna tóraǵalyq etedi. Halyqaralyq deńgeıde bedeli zor atalmysh uıymnyń genderlik tepe-teńdikti qoldaý jónindegi josparynda: «Uıym aımaǵynda jynysyna qaraı quqyqtyq shekteýge tyıym salynsyn. Erler men áıelder úıde de, qyzmette de, qoǵamda da teń quqyly bolýy tıis» dep kórsetilgen. «Zańdyq turǵydan alǵanda Qazaqstan qazir osy mindetti oryndaýǵa daıyn», dedi depýtat.
