Qazaqstan ǵaryshy 10-15 jyldan keıin Reseıdiń, Frantsııanyń, Eýropa kosmonavtıkasynyń ajyramas bóligi bolady - T. Áýbákirov
ALMATY. 5 qazan. QazAqparat /Názıra Eleýhan/ - Búgin Almaty qalasy tarıhynyń mýzeıinde Qazaqstan Respýblıkasy táýelsizdiginiń 20 jyldyǵyna oraı «Ǵaryshty baǵyndyrǵan tuńǵysh qazaq» degen taqyrypta qazaqtyń tuńǵysh ǵaryshkeri Toqtar Áýbákirovpen kezdesý uıymdastyryldy.
Kezdesýge tarıhshylar men Almaty qalasynyń mektep oqýshylary qatysty.
Kezdesý barysynda ǵaryshker kosmosty ıgerý men jerserikterdiń mańyzdylyǵyn, jerdi aıalaý qajet ekendigin atap ótip, jastardy áleýmettik mańyzy bar kásipterdi, ınjener, dánekershi syndy mamandyqty tańdaý qajet ekendigin aıtty. «Eldiń bolashaǵy - sizderdiń, búgingi jastardyń qolynda. Sondyqtan bilimdi jastar bolyńdar, nano-jańa tehnologııalardy ıgerińder»,-dedi T. Áýbákirov.
Kezdesý barysynda ol Qazaqstan ǵaryshynyń bolashaǵymen bólisti. «Qazaqstan kosmonavtıkasy 10-15 jyldan keıin Reseıdiń, Frantsııanyń, Eýropa kosmonavtıkasynyń ajyramas bóligi bolady. Bolashaqty bárimiz qosylyp, kosmos álemin zertteıtin bolamyz. Jerdegi barlyq adamzattyń mindeti - jerdi qutqarý. Kosmosty kim birinshi ıgeredi degen jantalas aıaqtaldy»,-dedi T. Áýbákirov.
