Qazaqstan ǵaryshtyq derjavaǵa aınalýdy maqsat tutyp otyr - T.Musabaev
ASTANA. Sáýirdiń 12-si. QazAqparat /Aıdar Ospanalıev/ - «Osydan tup-týra 49 jyl buryn qazaq jerinen adamzat tarıhynda alǵash ret adam ǵaryshqa ushty.
ıÝrıı Gagarınniń ǵaryshqa kóterilýi búkil álemdik damý úderisine ıgi yqpal etkeni barshaǵa aıan. Sol kúnnen bastap, 12 sáýir - Kosmonavtıka kúni retinde atalyp keledi. Al keler jyly Ǵarysh ǵasyrynyń bastalǵanyna jarty ǵasyr tolady», dedi búgin Ulttyq ǵarysh agenttiginiń tóraǵasy Talǵat Musabaev Astanada «Qazaqstannyń ǵaryshty ıgerý dáýiri: qazirgi jaǵdaıy, strategııa, ınnovatsııalar» atty taqyrypta ótken konferentsııa barysynda, dep habarlaıdy QazAqparat.
Onyń aıtýynsha, búgingi kúni ǵarysh tehnologııalary ǵylymnyń, tehnıkanyń damýyna ıgi yqpalyn tıgizip otyr. «Osy ýaqytta orbıtada myńdaǵan jer serikteri ushyp júr. Olar adamzat úshin qajetti asa mańyzdy strategııalyq mindetterdi oryndaýda. Ǵarysh apparattary Aıǵa jáne Veneraǵa ushyp, ol jaqtyń topyraq quramyn jerge jetkizdi. Sondaı-aq birneshe apparat kún júıesiniń aımaǵynan shyǵyp, álemdik órkenıet úshin qyzmet etip jatyr. Sodan beri kóp ýaqyt óte qoıǵan joq. Soǵan qaramastan, adamzat balasy sanaýly ǵana jyldardyń ishinde ǵarysh keńistigin ıgerýde úlken jetistikterge qol jetkizdi. Eń bastysy, álemdik qaýymdastyq ǵaryshsyz bolashaqty elestete almaıtyndaı kúıge jetti. Óıtkeni qazirgi zamanǵy joǵary tehnologııalardyń barlyǵy da ǵaryshpen baılanysty», dedi agenttik tóraǵasy.
Onyń aıtýynsha, búginde álemde ǵaryshtyq memleket atanýdyń
basty eki joly bar. Onyń birinshisi daıyn ǵaryshtyq júıeni syrt memleketterden satyp alý. Mundaı tásildiń bir kemshilgi - memleket ǵaryshty ıgerýde tájirıbeden ótý jaǵynan keıindep, bazalyq ınfraqurylymdy damytýdan qalady. Ekinshi jol - óte kúrdeli, ári uzaq úderis. Ol memlekettiń jeke óziniń ǵaryshtyq ınfraqurylymyn qalyptastyrý. Tek ǵaryshty osy jolmen ıgergen elderdi ǵarysh derjavalary dep ataýǵa bolady. «Búginde álemdegi kóptegen memleketter osy joldyń birinshisin tańdasa, Qazaqstan ǵaryshtyq derjavaǵa aınalýdy maqsat tutyp otyr. Biz osy tańdaýymyzdyń qıyndyǵy men tıimdiligin jaqsy túsinip otyrmyz. Óıtkeni kosmonavtıka biz úshin ulttyq maqtanyshqa aınalatyn nysan ǵana emes, ol bizdiń azamattarymyzdyń ómir sapasyn arttyrý úshin paıdalanatyn basty qural bolmaq», dedi T.Musabaev.
