Qazaqstan ǵarysh salasyndaǵy óz múddesin kóterip edi, bul jekelegen azamattardyń jaǵymsyz pikirlerin týǵyzdy - T. Musabaev

Búgin QR Parlamenti Májilisiniń jalpy otyrysynda QR Ulttyq ǵarysh agenttiginiń tóraǵasy Talǵat Musabaev osylaı málim etti, dep habarlaıdy QazAqparat.

Esterińizge sala keteıik, depýtattar «Qazaqstan Respýblıkasy men Reseı Federatsııasy arasyndaǵy «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasyn talqylaǵan bolatyn. Sóz arasynda depýtat Vladımır Nehoroshev Qazaqstan men Reseı arasyndaǵy ǵarysh salasyna qatysty aıtylyp júrgen áńgimelerge nazar aýdaryp, bul jaıynda Agenttik tóraǵasynan túsinik berýdi surady.

«Jaqynda birqatar BAQ-ta Qazaqstan men Reseı arasynda úlken kelispeýshilikter bolǵany týraly áńgimeler berilip, tipti bunda A. Permınovqa («Roskosmos» basshysy-red.) silteme jasaldy. Buǵan deıin de Reseı Dýmasynda dál osy másele boıynsha áńgime aıtylǵan bolatyn. Osyǵan oraı, Qazaqstan men Reseı arasynda ǵarysh salasyna qatysty qandaı da bir kelispeýshilikter oryn alǵan ba? Osy jaıynda túsinik berseńiz? », dedi V. Nehoroshev.

Óz kezeginde Ulttyq ǵarysh agenttiginiń tóraǵasy T. Musabaev Reseı Dýmasynda bolǵan áńgimeden tolyq habardar ekendigin bildirip, biraq ǵarysh salasyna qatysty ondaǵy máseleniń negizsiz aıtylǵanyn, buny «Roskosmos» basshysy da rastaǵanyn atap ótti. «Osydan eki apta buryn reseılik áriptesimmen bul jaıynda sóılestim. A. Permınov reseılik depýtattyń baıbalamyn qoldamaıtyndyǵyn aıtty. Al A. Permınovqa silteme jasalǵan maqalaǵa keletin bolsaq, bizge bundaı resmı aqparattardy eshkim jetkizgen joq. Reseılik tarap ta buny joqqa shyǵaryp otyr. Bul jýrnalısterdiń oıynan shyqqan dúnıe», dedi T. Musabaev.

Degenmen, Agenttik tóraǵasy máseleniń mánin aıta kele, birqatar jaıttyń basyn ashqandaı boldy. «2007 jylǵa deıin Qazaqstanda ǵarysh salasy qyzmetine qatysty ortalyq memlekettik organ bolmaǵan edi. Osydan úsh jyl buryn qurylǵan Ulttyq ǵarysh agenttiginiń maqsaty da Qazaqstandy ǵaryshtyq memleketterdiń qataryna kirgizýge umtylý bolyp tabylady. Óıtkeni, Qazaqstan áli de ǵaryshtyq memleketter qatarynda emes. Al Agenttik qurylǵannan bastap, biz josparly túrde «Baıqońyr» keshenine enýdi ózimizge mindet ettik. Jalpy, «Baıqońyr» kesheni tek Qazaqstannyń ǵana jeke menshigi, biraq is júzinde onda eshqandaı da qazaqstandyq ǵaryshtyq kásiporyndar bolǵan joq. Sondyqtan, qazirgi kúni biz reseılik áriptestermen birlesip «Báıterek» atty jańa zamanǵy zymyran-ǵaryshtyq keshenin qurýǵa kiristik. Budan bólek, biz osy «Baıqońyr» kesheniniń ıesi retinde keńestik kezeńde qalyptasqan zymyran-ǵaryshtyq keshenderge de atsalysqymyz keledi. Atap aıtqanda, Qazaqstan Keńes Odaǵynyń mırasy bolyp tabylatyn «Zenıt» jobasyna qatysýǵa nıetti. Keńestik mura bolǵandyqtan, bul tek Reseıge ǵana emes, bizdiń elimizge de tıesili dúnıe. Qazaqstan bul jobaǵa qatysýǵa tolyq ári alǵashqy kezektegi quqyqqa ıe. Minekı, biz osy máseleni «Roskosmos» jáne basqa da reseılik uıymdar aldynda kótergen edik. Bunymyz birshama mamandardyń «alańdaýshylyǵyna» ulasqan syńaıly. Osynyń negizinde, ıaǵnı biz óz múddemizdi kóterip, buǵan deıin joly bolmaı kelgen ǵaryshtyq salany odan ári damytý týraly áńgime qozǵap edik, bul jekelegen azamattardyń jaǵymsyz, keri pikirlerin týǵyzdy», dedi T. Musabaev.