Qazaqstan ǵaryshtaǵy spýtnık sanyn 14-ke jetkizedi — Jaslan Mádıev
ASTANA. KAZINFORM — Qazaqstannyń halyqaralyq spýtnıktik tobyna taǵy birneshe el qosylýy múmkin. Bul týraly Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi.
Qazirgi ýaqytta Qazaqstan Jerdi qashyqtan zondtaý jobasyna úsh eldiń qatysýy jóninde kelisimge keldi.
— 2030 jylǵa qaraı jerdi baqylaýǵa arnalǵan toǵyz spýtnıkten turatyn halyqaralyq top qurýdy josparlap otyrmyz. Onyń quramyna Qazaqstannyń alty spýtnıgi, sondaı-aq Mońǵolııa, Kongo Respýblıkasy jáne Nıgerııanyń spýtnıkteri kiredi. Biz jańa seriktestermen yntymaqtastyqqa ashyqpyz jáne spýtnıktik topty 14 apparatqa deıin keńeıtý múmkindigin kórip otyrmyz, — dedi Jaslan Mádıev Space Days Kazakhstan halyqaralyq forýmynda.
Sonymen qatar Qazaqstan KazSat-3 spýtnıgin jańa KazSat-3R apparatyna aýystyrý jumystaryn júrgizip jatyr. Mınıstrdiń aıtýynsha, bul ulttyq spýtnıktik baılanys júıesiniń turaqty jumysyn qamtamasyz etý jáne onyń zamanaýı tehnologııalyq talaptarǵa sáıkestigin saqtaý úshin qajet.
Mınıstr ǵaryshtyq ınjenerııanyń damýy týraly da aıtty. Astanada ǵarysh apparattaryn qurastyrý jáne synaqtan ótkizýge arnalǵan keshen jumys isteıdi.
— Bul keshen ǵarysh apparattaryn qurastyrýǵa, negizgi synaqtardy júrgizýge, ulttyq ınjenerlik bazany damytýǵa jáne halyqaralyq óndiristik jobalarǵa qatysýǵa múmkindik beredi, — dep atap ótti mınıstr.
Buǵan deıin Jaslan Madıev Qazaqstan ǵaryshtyq tehnologııalardy ekonomıkanyń, memlekettik basqarýdyń jáne azamattardyń naqty qajettilikterin sheshýge baǵyttaýy kerek ekenin aıtqan edi.
