Qazaqstan ǵalymdarynyń Forýmyna qatysýshylardyń jurtshylyqqa arnaǵan Úndeýi
ASTANA. 1 jeltoqsan. QazAqparat. Búgin Almatyda Elbasy Nursultan Nazarbaevtyń qatysýymen Qazaqstan ǵalymdarynyń Forýmy ótti. Forýmǵa qatysýshylar halyqqa Úndeý arnady. Tómende atalǵan Úndeýdiń mátinimen tanysýǵa bolady:
Biz, 2011 jylǵy 1 jeltoqsanda Almaty qalasynda ótken Qazaqstan ǵalymdarynyń Forýmyna qatysýshylar, ǵylym salasynyń ózekti strategııalyq damý máselelerin talqylaı kele Qazaqstan jurtshylyǵyna úndeý tastaımyz.
Qazaqstan Táýelsizdiginiń 20 jyldyǵy qarsańynda ótken Forým jáne Qazaqstan Respýblıkasynyń Prezıdenti, Elbasy Nursultan Ábishuly Nazarbaevtyń sóılegen sózi otandyq ǵylymnyń, elimizdiń ǵylymı-tehnıkalyq jáne ınnovatsııalyq damý bolashaǵyn jańasha uǵynýǵa múmkindik berdi.
El Prezıdentiniń ǵylymı negizdelgen strategııalyq baǵytynyń arqasynda 20 jyl ishinde álemdegi ekonomıkasy qarqyndy damyǵan elderdiń qataryna engen jańa memleket quryldy. Indýstrıaldy-ınnovatsııalyq damý Qazaqstan damýynyń basym strategııasyna aınaldy. Munda ǵylym ınnovatsııanyń negizi bolyp, mańyzdy memlekettik baǵdarlamalardy iske asyrýǵa tikeleı aralasýy qajet.
Bıylǵy jyl Qazaqstan ǵylymynyń jańa sapaǵa ótýiniń mańyzdy mejesi boldy. Memleket basshysynyń bastamasymen qabyldanǵan ǵylym salasyn basqarýdyń jańa úlgisi men «Ǵylym týraly» jańa Zań, zertteýlerdi buryn-sońdy bolmaǵan qarjylandyrý kólemi jáne olardyń jańa nysandaryn engizý - ǵylymdy ekonomıkaǵa tıimdi endirýdiń jáne Qazaqstannyń ınnovatsııalyq jańarýynyń negizgi faktory boldy.
Osy aýqymdy mindetterdi iske asyrý úshin ǵalymdardyń, memlekettiń, bıznestiń jáne barlyq qoǵamnyń kúshterin tıimdi túrde biriktirý qajet.
Biz Qazaqstannyń Tuńǵysh Prezıdenti, Elbasy Nursultan Ábishuly Nazarbaevqa ǵylym salasyn únemi nazarynan tys qaldyrmaı, qamqorlyq jasap, strategııalyq qoldaý kórsetkeni úshin shyn kóńilden alǵys bildiremiz.
Qazaqstan ǵalymdary el bolashaǵyn qurýǵa, áleýmettik jáne mańyzdy ekonomıkalyq máselelerdi sheshýge budan da belsendi, ári nátıjeli túrde qatysatynyna senimdimiz.
Biz bıznes ókilderine ǵylymı jetistikter bazasynda óndiristi keńinen jańartýǵa, zertteýlerdi kommertsııalandyrý tetikterin qurýǵa qatysýǵa jáne osy saladaǵy memlekettik - jekemenshik áriptestikti damytýǵa shaqyra otyryp, úndeý tastaımyz.
Biz otandyq ǵylym jetistikterin barynsha nasıhattaýǵa jáne olardy praktıka júzinde iske asyrýǵa, jastardyń ǵylym men ınnovatsııaǵa degen qyzyǵýshylyǵyn týdyrýǵa, ǵalymdar men ınnovatorlar eńbeginiń bedelin kóterýge shaqyramyz.
Biz joǵary ıntellektýaldyq áleýeti bar jastarǵa ǵylymmen batyl túrde aınalysyp, qajyrly eńbek etýge jáne jańa ǵylymı nátıjelerdi tıimdi túrde paıdalana bilýge úndeımiz.
Biz qazaqstandyq ǵylymnyń bolashaǵyn oılaıtyn barsha qaýymmen ózara qarym-qatynas jasaýǵa daıynbyz.
Biz kópshilik bolyp, jumyla kiriskende ǵana elimizdi álemdik deńgeıdegi bilim ortalyǵyna aınaldyrý úshin qajetti jaǵdaılar jasaı alamyz.
Elimizdegi ǵylymnyń ilgerileýi men jańa Qazaqstannyń jarqyn bolashaǵy bizge baılanysty.
Qazaqstannyń ǵylymı qaýymdastyǵy Qazaqstan Respýblıkasynyń Tuńǵysh Prezıdenti, Ult kóshbasshysy N.Á.Nazarbaevqa memlekettik joǵary nagrada «Halyq Qaharmany» ataǵyn berý jónindegi bastamany biraýyzdan qoldaıdy.
Alǵa, Qazaqstan!
Biraýyzdan qabyldandy
2011 jylǵy 1 jeltoqsan
