«Qazaqstan ǵalymdary jasaǵan jańa tehnologııalarǵa suranys joq» - respýblıkalyq basylymdarǵa sholý
***
Keshe Aqordada Memlekettik hatshy Muhtar Qul-Muhammed sporttaǵy joǵary jetistikter men dene shynyqtyrýdyń odan ári damýyna arnalǵan respýblıkalyq keńes ótkizdi. Otyrys jumysyna Prezıdent Ákimshiligi Basshysynyń orynbasary Baǵlan Maılybaev, Sport jáne dene shynyqtyrý isteri agenttiginiń tóraǵasy Talǵat Ermegııaev qatysty. Osy alqaly jıyn arqaý bolǵan maqala «Egemen Qazaqstan» gazetinde «Sport - Elbasynyń aıryqsha nazarynda turǵan sala» degen taqyryppen berilgen. «Barshańyzǵa aıan, sport - Elbasynyń aıryqsha nazarynda turǵan sala. Prezıdent sportqa kúndelikti qamqorlyq jasap qana qoımaı, onyń kóptegen túrlerimen ózi de belsene aınalysyp, otandastarymyzǵa únemi úlgi-ónege kórsetip keledi. Mine, elimizdegi sportqa degen osyndaı ornyqty kózqarastyń arqasynda Qazaqstandy álemdik sport qaýymdastyqtary moıyndaı bastady»,- dep atap ótti alqaly jıyndy ashqan Memlekettik hatshy.
***
Reseı premer-mınıstri Dmıtrıı Medvedevtiń Eýrazııalyq Odaqta ortaq valıýta qoldaný týraly málimdemesinen keıin Reseı Memlekettik Dýmasynyń TMD isteri boıynsha komıtet tóraǵasy «ortaq valıýta da, ortaq til de, ortaq shekaralar da kerek» ekenin aıtty. Osyǵan oraı «Aıqyn» gazeti sarapshylardyń pikirin bilgen. Máselen, Májilis depýtaty Orazkúl Asanǵazy: «Rýhanı qundylyǵymyzdy túgendemeı turyp, oǵan áli erte. Odan keıin kimmen jáne qalaı qosylsaq ta, eshqandaı qorqynysh bolmas edi. Al basqa eldermen jahandasýdyń, dostasýdyń eshqandaı ersiligi joq. Biraq ekonomıkalyq máseleniń artynda ulttyq múdde de qalyp ketpeýi kerek», - deıdi. Elge tanymal azamattardyń pikirleri «Eýrazııalyq odaq: valıýta da, til de ortaq bolýy kerek pe?» degen taqyryp aıasyna toptasqan.
Sonymen qatar osy basylymda Postkeńestik keńistikti zertteý jónindegi aqparattyq-saraptama ortalyǵynyń dırektory Alekseı Vlasovpen aradaǵy suhbat «Qazaq eli saıası tranzıttiń tabaldyryǵynda tur» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Sońǵy ýaqytta Qazaqstanda da, Reseıde de saıası jobalardy basqarýdyń sapasy álsirep qaldy. Eki elde de osy jobalardyń basy-qasynda júrgen sheneýnikterimizdiń jumys sapasyna kóńilim tola bermeıdi. Qysqa nemese óte qysqa merzimge saıası boljamdar, saraptamalar jasaǵan kezde bul jaǵdaıdy eskermesek bolmaıdy», - deıdi.
***
«Alash aınasy» gazetiniń turaqty «Dat!» aıdarynda Ál-Farabı atyndaǵy QazUÝ-dyń fakýltet dekany, hımııa ǵylymynyń kandıdaty Erdos Ońǵarbaevpen aradaǵy suhbat «Qazaqstan ǵalymdary jasaǵan jańa tehnologııalarǵa suranys joq» degen taqyryppen berilgen. Basylym tilshisiniń barlyq saýalyna egjeı-tegjeıli jaýap bergen ǵalym: «Bolashaq ǵalymdar ǵylymǵa berilgen tulǵa bolýy tıis. Jastar ǵylymǵa qandaı jaǵdaıda ózderiniń bilimderin arnaıdy? Olardyń basynda baspanasy, jetkilikti eńbekaqysy, ǵylymı-zertteý júrgizýge qajet zamanaýı qural-jabdyqtar men materıaldary bolsa ǵana ǵylymǵa jastar kóptep tartylar edi»,- deıdi.
***
Adamzat tarıhyndaǵy alǵashqy Aıǵa týrıstik sapar jasaý Qazaqstan aýmaǵynda júzege aspaq. Bul jaıynda «Ekspress K» gazetinde «Gorıaşıı týr na Lýný» degen taqyryppen jaryq kórgen maqalada keńinen baıandalǵan. Basylymnyń atap ótýinshe, brıtandyq Excalibur Almaz kompanııasy Jer serigine saıahat jasaýǵa nıet tanytqan kez kelgen jandy jetkizýge daıyn ekendikterin jarııa etip otyr. Aıǵa saparlaýdyń quny da belgili. Anaý-mynaý emes baqandaı 100 mln. fýnt sterlıng. Joba 2015 jyly iske asyrylmaq. «Biz qazirdiń ózinde bıletterdi satýǵa daıynbyz», - depti atalǵan kompanııanyń basshysy Art Dıýl.
