Qazaqstan ǵalymdary urshyq býynyn endoprotezdeý tehnologııasyn jetildirdi
ASTANA. QazAqparat - Qazaqstannyń bir top ǵalymdary urshyq býynyn aýystyrý tehnologııasyn jetildirip, operatsııadan keıin asqyný táýekelin tómendetti. Osy jetistikteri úshin olar ál-Farabı atyndaǵy syılyqty aldy. Búgin Ortalyq kommýnıkatsııalar qyzmetindegi baspasóz máslıhatynda osy ǵylymı eńbek jaıynda medıtsına ǵylymdarynyń doktory, professor Shalǵynbaı Baımaǵambetov aıtyp berdi.
Aıta keteıik, «Urshyq býynynyń hırýrgııasynda endoprotezdeýdi qoldaný arqyly ınnovatsııalyq tehnologııalardy ázirleý jáne engizý» taqyrybyndaǵy jumysy úshin QR DSÁDM «Travmatologııa jáne ortopedııa ǵylymı-zertteý ınstıtýty» RMK-nyń dırektory, medıtsına ǵylymdarynyń doktory, professor Nurlan Batpenov, atalǵan ınstıtýttyń №3 ortapedııa bólimshesiniń meńgerýshisi, medıtsına ǵylymdarynyń kandıdaty Qaırat Áshimov, ınstıtýt dırektorynyń orynbasarlary, medıtsına ǵylymdarynyń doktory, professor Shalǵynbaı Baımaǵambetov, medıtsına ǵylymdarynyń kandıdaty, dotsent Qýanysh Ospanov, №4 ortopedııa bólimshesiniń meńgerýshisi, medıtsına ǵylymdarynyń kandıdaty Alekseı Belokobylov, №5 ortopedııa bólimshesiniń meńgerýshisi, medıtsına ǵylymdarynyń kandıdaty Erik Raımaǵambetov ál-Farabı atyndaǵy syılyqty alǵan bolatyn.
Sh. Baımaǵambetovtyń aıtýynsha, urshyq býynynyń hırýrgııasynda endoprotezdeýdi qoldaný jobasy boıynsha ǵalymdar komandasy 15 jyl jumys istedi.
«Barlyqtaryńyz jaqsy bilesizder, kez kelgen tehnologııanyń oń jáne keri tustary bolady. Bizdiń ǵalymdardan quralǵan top sheteldik tájirıbe boıynsha ınnovatsııalyq tehnologııalardy qoldaný kezinde belgili bir kemshilikter bar ekenin anyqtady. Operatsııalardy jasaý kezinde týyndaıtyn túrli asqyný saldaryn tómendetý úshin atalǵan tehnologııalardy jetildirý boıynsha sharalar keshenin ázirleý maqsaty belgilendi. Ásirese, bul qadamdar urshyq býyny aýrýlaryn emdeý kezinde qajet boldy», - dedi ol.
Ǵylymı jumys barysynda tereń zertteýler júrgizilip, matematıkalyq kompıýterlik modeldeý men tájirıbe júzinde iske asyrýǵa qol jetkizildi.
«Tereń zertteýler halyqaralyq standarttarǵa sáıkes bolýy kerek, sondyqtanda da biz osy jumystardy Germanııadaǵy Mıýnster ýnıversıtetinde júzege asyrdyq. Sol jerde osy endoprotezdeý modelderin shyǵarý retke keltirildi. Qazirgi zamanǵy tehnologııalardy paıdalanýmen matematıkalyq jáne kompıýterlik medeldeýdi biz Tsıolkovskıı atyndaǵy Máskeý avıatsııalyq ınstıtýtymen birlese jasadyq. Atalǵan tehnologııany tájirıbe júzinde iske asyrýdy bizdiń ǵylymı-zertteý ınstıtýtynda bir top avtorlar júrgizdi», - dedi ol.
Osy oraıda otandyq ǵalymdar urshyq býynyn endoprotezdeýdiń konstrýktıvti erekshelikterin ózgertip, operatsııadan keıingi asqyný saldaryn tómendetýge qol jetkizdi. Bul jetildirilgen tehnologııa Qazaqstannyń óńirlerinde engizildi.
