Qazaqstan ǵalymdary suranysy joǵary 70-ten astam ónimdi usynady
ASTANA. QazAqparat - Ǵalymdar aldyndaǵy ákimshilik kedergilerdi joıý kerek. Bul týraly «Ǵylymı jáne ǵylymı-tehnıkalyq qyzmet nátıjelerin kommertsııalandyrý týraly» Zańyn júzege asyrý barysy týraly baıandaǵan QR Bilim jáne ǵylym mınıstrligi Ǵylym komıtetiniń tóraǵasy Bolatbek Ábdirásilov málim etti, dep habarlaıdy QazAqparat.
«2016 jyldan ǵylymı-zertteý jumystarynyń nátıjelerin kommertsııalaýǵa baılanysty sharalar qarqyndy bastaldy. Bul óz kezeginde ǵalymdarymyz úshin jańa baǵyt bolyp otyr. Negizinde zańnama óte jaqsy jazylǵan, naqty máseleler kórsetilgen», - dep toqtaldy B. Ábdirásilov «Nur Otan» partııasynda «Joǵary tehnologııalardy damytý» jónindegi komıssııanyń otyrysynda.
Komıtet basshysynyń sózine qaraǵanda, qazirgi qazirgi kezde kommertsııalandyrý protsesi Ǵylym qory men Dúnıejúzilik bank granttary esebinen qoldaýǵa ıe bolýda. 2016-2017 jyldary kommertsııalandyrý jobalaryn granttyq qarjylandyrýǵa úsh konkýrs ótkizildi. Qazirgi ýaqytta Ǵylym qory jelisi boıynsha taǵy bir konkýrs aıaqtalýǵa jaqyndady.
«Jalpy, 2016 jyly iriktelinip alynǵan 8,4 mlrd teńgeniń 47 jobasy qarjylyndyrylyp jatyr, onyń ishinde birlesip qarjylandyrýdyń úlesi 10 paıyzdy qurady. Sonymen qatar qazirgi kezde Dúnıejúzilik bank jobalary aıasynda 17 jobanyń avtorlarymen grant týraly Kelisimdi bekitý jóninde jumystar atqarylyp otyr. Osy oraıda bul jobalardyń quny 2,7 mlrd teńgege baǵalanýda. Búginde bıznes tarapynan tartylǵan qarjynyń úlesi 911 mln teńgege jýyqtady»,-dedi komıtet tóraǵasy.
Onyń aıtýynsha, árbir jobany júzege asyrý kezeńi 3 jyldy quraıdy.
«Jobalardyń aıaqtalýy ýaqytyna qaraı (2018 jyldyń sońynda) ónimder men qyzmetterdiń 79 jańa túrin qurý josparlanyp otyr. Sonymen qatar jyl saıyn shyǵarylatyn jáne satylatyn ónimniń kólemi 4,47 mlrd teńgeni quramaq. Osy oraıda salyqtyq aýdarymdar 390,4 mln teńgege jetedi», - dedi Bolatbek Ábdirásilov.
Budan bólek ol búginde ǵalymdar aldynda ákimshilik kedergiler bar ekenin atap ótti.
«Bul turǵyda qazir talqylanyp jatqan máseleniń biri kommertsııalandyrý jobalaryn qosylǵan qun salyǵynan bosatýǵa qatysty. Bizde ǵylymı jobalar qosylǵan qun salyǵynan bosatylǵan, al kommertsııalandyrý baǵytynda júzege asyrylatyn granttyq jobalarǵa 12 paıyz QQS-ty tóleýge týra keledi. Osy oraıda bizdiń jumystardy qarjylandyrýdyń deńgeıi tómendetiledi», - dedi komıtet basshysy.
