Qazaqstan ǵalymdary COVID-19-ǵa qarsy tiri vaktsınanyń klınıkaǵa deıingi synaǵyn aıaqtaıdy
Bul týraly búgin Úkimet otyrysynda Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa aıtty.
«2020 jyly COVID-19-ǵa qarsy QazCovid-in (saýdalyq ataýy QazVac) ınaktıvtelgen vaktsınasy jáne QazCoVac-P qarsy sýbbirlikti vaktsınasy ázirlenip, klınıkalyq zertteýlerden ótti. 2021 jyly COVID-19 qarsy kaprıpoksvırýs negizindegi jáne tumaý vırýsyna negizdelgen vektorlyq vaktsınalar jasaldy. Ekeýi de klınıkaǵa deıingi synaqtardan ótti. Sodan soń álemdegi COVID-19-ǵa qarsy alǵashqy tiri vaktsınasy jasaldy. Ol klınıkaǵa deıingi synaqtardyń aıaqtalý kezeńinde», - dedi ol.
Sonymen qatar mekemeniń bas dırektory sońǵy jyldardaǵy negizgi ǵylymı jetistikterine toqtaldy.
«2018 jyly sheteldik balamalardan úsh ese arzan baǵamen nodýlıarlyq dermatıtke qarsy vaktsına ázirlendi. Respýblıkalyq bıýdjettiń 6 mlrd teńge qarjysy únemdeldi. 2019 jyly brýtsellezge qarsy jańa vektorlyq vaktsına jasaldy. 2020 jyly túıe sheshegine qarsy vaktsına ázirlenip, Aýyl sharýashylyǵy mınıstrliginiń tapsyrysy boıynsha óndirildi. Vaktsına aýrýdyń taralýyna jol bermedi», - dedi Kúnsulý Zakarıa.
