Qazaqstan ǵalymdary aýaǵa parnıktik gazdyń shyǵarylýyn tómendetý tehnologııasyn jetildirdi
ASTANA. QazAqparat - Qazaqstan ǵalymdary aýaǵa parnıktik gazdyń shyǵarylýyn tómendetý tehnologııasyn jetildirdi, dep habarlaıdy QR Bilim jáne ǵylym mınıstrligi Ǵylym komıtetiniń baspasóz qyzmeti.
««Ǵylym qory» AQ granttyq qoldaýynyń arqasynda L.N. Gýmılev atyndaǵy EUÝ «Energııa únemdeý jáne energııa tıimdi tehnologııalar» ǴZI dırektory Altaı Álimǵazın bastaǵan ǵylymı top ónerkásip kásiporyndarynyń óndirisinde derbes jáne mobıldi túrde paıdalanylatyn blokty-modýldi jylý sorǵysyn qoldanysqa engizip jatyr. Jylý sorǵysy zerttemesi 2012-shi jyldan beri QR Bilim jáne ǵylym mınıstrliginiń granttyq qarjylandyrýy esebinen júrgizilip keledi. Tehnologııa qalalyq ınfraqurylymdardyń jylyjaılyq gazdaryn shyǵarý deńgeıin tómendetýge múmkindik beredi» delingen habarlamada.
Keltirilgen málimet boıynsha, bul jobanyń jańalyǵy Qazaqstanda buryn-sońdy bolmaǵan tehnologııalyq ıdeıa men óndiristi iske qosýda jatyr.
«Búgingi tańda jylý sorǵy qurylǵysynyń pılottyq jobasy Pavlodardaǵy KSP-Steel zaýyty bazasyna engizilgen, 2020-shy jylǵa qaraı kommertsııalyq tabysqa qol jetkizý kózdelip otyr. Elimizde jylý sorǵylaryn shyǵarý óndirisin retteý úshin ǵylymı top pen kásiporyn arasynda zaýyt aýmaǵynda qurastyrý óndirisin salý týraly kelisim bar» dep jazylǵan Feısbýktegi habarlamada.
Ǵylymı zertteme ІT-jabdyqtardy sýytýǵa múmkindik beredi, onyń qataryna maınıngtik fermalar da kiredi. Qurylǵylardan jylýdy buryp jiberý tehnologııasyna Bitfury kópsalaly blokcheın-kompanııasy qyzyǵýshylyq tanytyp otyr.
