Qazaqstan ǵalymdarynyń onkologııaǵa qarsy dárisin shyǵarý úshin qansha aqsha kerek
ASTANA. KAZINFORM – Ǵylym jáne joǵary bilim mınıstrligi Kazinform saýalyna joldaǵan jaýapta akademık Dos Sarbasov bastaǵan qazaqstandyq ǵalymdardyń onkologııa qarsy dárisin óndiristik deńgeıge shyǵarý úshin qansha aqsha ketýi múmkin ekenin aıtty.
- «National Laboratory Astana» jeke mekemesiniń aqparatyna sáıkes preparattyń resmı saýda ataýy tirkeý kezinde belgilenedi jáne odan ári paıdalaný protsesi kezinde qoldanylady. Bul preparattyń patenttelmegen halyqaralyq jalpy ataýy – «Erıtorb qyshqyly». Klınıkalyq zertteý satysynda qoldanylatyn ádettegi ataýy – DVC. Eger QR Densaýlyq saqtaý mınıstrligi arqyly atalǵan preparat tirkelgen jaǵdaıda, patsıentterdi emdeý úshin klınıkada qoldanýǵa ruqsat etilgenin bildiredi. Dúnıejúzilik densaýlyq saqtaý uıymy dári-dármekterdi tirkeýmen aınalyspaıdy (vaktsınalar úshin pandemııa kezinde erekshe jaǵdaı jasaldy). Qazirgi ýaqytta klınıkalyq zertteýlerdiń birinshi kezeńi (qaýipsizdik pen tózimdilikti baǵalaý) aıaqtalýǵa jaqyn. Zertteletin preparat (DVC) jáne myshıak trıoksıdimen (arsenic trioxide) DVS kombınatsııasy qanaǵattanarlyq túrde tózimdi ekendigi anyqtaldy, - dep jazylǵan vedomstvonyń «National Laboratory Astana» jeke mekemesimen birlesip ázirlegen jaýabynda.
Klınıkalyq synaqtar birneshe kezeńmen, ár kezeń birneshe satymen ótetinin buǵan deıin jazǵan edik.
- Odan ári klınıkalyq zertteýlerdiń úshinshi kezeńi júrgizilýi kerek. Qoldanýdyń mańyzdy kórsetkishterin tańdaý úshin qaterli isiktiń ártúrli formalary men túrlerinde zertteletin preparattyń tıimdiligin paıdalaný kózdelgen. Osy ýaqytqa deıin standartty terapııanyń áseri bolmaǵan kezde qaterli isiktiń 4-satysyndaǵy naýqastardyń jaǵdaıynyń turaqty ekendigi týraly aıtýǵa bolady.
Qazirgi ýaqytta zertteletin DVC dárilik preparaty barlyq qajetti jaǵdaılary bar jáne GMP boıynsha attestattalǵan óndiristik alańynda óndiriledi. Halyqaralyq ádebıetterde ozyq farmatsevtıkalyq kompanııalardyń tájirıbesine súıene otyryp, terapevtik salaǵa baılanysty jańa preparatty ázirleý quny 314 mıllıonnan 4,46 mıllıard dollarǵa deıin dep esepteledi. DVC kórsetkish keńistiginiń aıqyn bolmaǵandyǵyn eskere otyryp, ınvestıtsııalyq qarajattyń ótelý merzimin esepteý qıyn, - delingen jaýapta.
Qazirgi tańda preparat kolorektaldy qaterli isikke qoldanylady.
- Bul - qaterli isiktiń eń kóp taralǵan túrleriniń biri. Qazaqstanda jyl saıyn kolorektaldy qaterli isiktiń 3000-nan astam jańa jaǵdaıy anyqtalady. Onkologııalyq aýrýlardyń qurylymynda kolorektaldy qaterli isik 4-orynda. Alaıda, klınıkalyq zertteýlerdiń úshinshi kezeńi aıaqtalǵannan keıin tıimdilik spektri anyqtalady jáne sol kezde DVC qoldanýdyń keńistigi men ınvestıtsııalanǵan qarajattyń ótelý ýaqytyn dálirek kórsetýge bolady, - dep jazady mamandar.
Qazaqstandyq ǵalymdardyń ǵylymı nátıjeleri álemdik ǵylymı qoǵamdastyqta myna jarııalanymdar arqyly usynylǵan.
- Dáıeksózge súıensek, DVC zertteý nátıjelerine joǵary qyzyǵýshylyq bar. Osy jobany kommertsııalandyrý – klınıkalyq zertteýdiń qorytyndy nátıjelerin alǵannan keıin bolatyndyǵy zańdylyq. Preparat kóktamyr ishine engizýge arnalǵan eritindi túrinde qol jetimdi bolady. Klınıkalyq zertteýler aıaqtalǵanǵa jáne nátıjeler jarııalanǵanǵa deıin sheteldik ınvestorlardyń qyzyǵýshylyǵyna úmittený qıyndaý bolyp otyr, - dep jazylǵan vedomstvo málimetinde.
Eske salsaq, Premer-Mınıstr Oljas Bektenov Úkimettiń keńeıtilgen otyrysynda preparattyń jyl sońyna deıin tirkeýden ótetinin málim etken bolatyn.