Qazaqstan fýtzal qaýymdastyǵynyń prezıdenti qyzmetinen ketti
ASTANA. KAZINFORM — Nursultan Qurman Qazaqstan fýtzal qaýymdastyǵynyń prezıdenti qyzmetinen ketkeni týraly málimdedi.
N.Qurman Instagram áleýmettik jelisindegi paraqshasynda jazǵanyndaı, ózi osyndaı sheshim qabyldaǵan.
Ol bul qyzmettiń úlken jaýapkershilikpen qatar mol tájirıbe men erekshe estelikterge toly kezeń bolǵanyn atap ótti. Nursultan Qurman osy ýaqyt ishinde otandyq fýtzaldyń damýy jolynda birge eńbek etken barsha áriptesterine, klýb basshylaryna, jattyqtyrýshylarǵa, sportshylarǵa jáne jankúıerlerge alǵysyn aıtty.
— Qazaqstan fýtbol federatsııasynyń prezıdenti Marat Talǵatulyna erekshe alǵys aıtqym keledi. Maǵan senim bildirip, qoldaý kórsetkeni jáne birlesip jumys isteýge múmkindik jasaǵany úshin rızashylyǵymdy bildiremin. Ortaq maqsat jolyndaǵy áriptestigimiz men úshin baǵaly tájirıbe boldy. Árıne, kez kelgen jumysta jetistiktermen qatar, qıyndyqtar da bolady. Degenmen, osy ýaqyt aralyǵyndaǵy jumsalǵan kúsh-jiger men atqarylǵan eńbek men úshin árdaıym qymbat. Qazaqstan fýtzalynyń bolashaǵy jarqyn ekenine senemin. Ulttyq quramamyzǵa, klýbtarymyzǵa jáne osy sporttyń damýyna úles qosyp júrgen barsha azamattarǵa sáttilik tileımin, — dedi N.Qurman.
Eske sala keteıik, budan buryn Qazaqstan fýtzal quramasynyń Belarýsten iri eseppen jeńilgenin jazǵan edik.
