Qazaqstan fýtbolynda jańa reformalar: klýbtardy jekeshelendirý máselesi talqylandy
ASTANA.KAZINFORM - Qazaqstan Respýblıkasy Ulttyq Olımpıadalyq komıteti men Qazaqstan fýtbol federatsııasynyń ókilderi fýtboldy damytý máselelerin talqylady, dep habarlaıdy Qazaqstan fýtbol federatsııasynyń baspasóz qyzmeti.
Kezdesýge Qazaqstan UOK bas hatshysy Álimjan Aqaev pen Sport departamentiniń dırektory Bektur Qııatbaı, al QFF tarapynan bas hatshy Skott Mann men bas hatshynyń keńesshisi Amantaı Baıǵalı qatysty.
Kezdesý barysynda Skott Mann Qazaqstan fýtbolynda josparlanyp otyrǵan reformalardyń negizgi baǵyttaryn tanystyrdy. Taraptar fýtbol salasyn kommertsııalandyrý, fýtbol klýbtaryn jekemenshikke berý, sondaı-aq áıelder men jasóspirimder fýtbolyn damytý máselelerin qarastyrdy.
Budan bólek, sport salasyndaǵy kadrlyq jáne basqarý áleýetin arttyrýǵa erekshe nazar aýdaryldy.
Qazaqstan UOK ókilderi bilim berý bastamalary jáne Halyqaralyq Olımpıada komıtetiniń Olympic Solidarity baǵdarlamasy usynatyn múmkindikter týraly aqparat berdi.
Sondaı-aq taraptar Qazaqstan UOK-niń Halyqaralyq Olımpıada komıtetimen, halyqaralyq jáne ulttyq sport federatsııalarymen ózara is-qımyl tájirıbesin talqylady. Sport uıymdarynyń jumysy men mamandardyń kásibı biliktiligin arttyrýǵa baǵyttalǵan halyqaralyq olımpıadalyq baǵdarlamalardy paıdalaný múmkindikteri de sóz boldy.
Skott Mann QFF qyzmetkerleri men menedjerleriniń Qazaqstan UOK uıymdastyratyn bilim berý jobalaryna qyzyǵýshylyq tanytyp otyrǵanyn aıtty.
Onyń sózinshe, QFF ókilderi ákimshilik kýrstarǵa, genderlik teńdik pen áıelder kóshbasshylyǵyna arnalǵan baǵdarlamalarǵa, sondaı-aq sport mamandarynyń kásibı biliktiligin arttyrýǵa baǵyttalǵan basqa da jobalarǵa qatysýǵa nıetti.
QFF bas hatshysy Qazaqstan UOK bastamalaryn jan-jaqty qoldaýǵa daıyn ekenin jetkizdi.
Onyń aıtýynsha, bul uıymdar arasyndaǵy tájirıbe jáne kásibı bilim almasýdy keńeıtýge múmkindik beredi.
Kezdesý sońynda taraptar birlesken jumysty jalǵastyryp, Qazaqstan sportynyń múddesi úshin ózara baılanysty odan ári nyǵaıtýǵa ýaǵdalasty.
Osyǵan deıin PSG Academy Qazaqstanda alǵash ret resmı fýtbol akademııasyn ashatyny týraly jazdyq.
