Qazaqstan fýtboldan Eýropa chempıonaty jerebesi aldynda qaı sebetke ornalasty
ASTANA. KAZINFORM — Fýtboldan Qazaqstan quramasy 2028 jylǵy Eýropa chempıonatynyń irikteý týrnıriniń jerebe tartý rásimi aldynda qaı sebetke ornalasqany belgili boldy.
UEFA 2026/27 maýsymyndaǵy Ulttar lıgasynyń toptyq kezeńiniń qorytyndysy boıynsha jalpy reıtıng negizinde 54 quramany bes sebetke bóldi. Qazaqstan bul boıynsha 45-orynǵa taban tiredi.
Jerebe tartý rásiminde qurama alǵashqy úsh sebettiń árqaısysynan bir-bir qarsylas alady. Eger qazaqstandyqtar bes quramadan turatyn topqa tússe, olarǵa besinshi sebetten taǵy bir komanda qosylady.
Jerebe aldyndaǵy sebetter quramy:
Birinshi sebet: Anglııa, Portýgalııa, Frantsııa, Germanııa, Ispanııa, Belgııa, Nıderland, Norvegııa, Grekııa, Italııa, Danııa, Horvatııa.
Ekinshi sebet: Ýels, Serbııa, Túrkııa, Chehııa, Shveıtsarııa, Shvetsııa, Aýstrııa, Soltústik Irlandııa, Slovenııa, Bosnııa jáne Gertsegovına, Vengrııa, Irlandııa.
Úshinshi sebet: Ýkraına, Shotlandııa, Kosovo, Polsha, Izraıl, Rýmynııa, Grýzııa, Soltústik Makedonııa, Chernogorııa, Albanııa, Islandııa, Slovakııa.
Tórtinshi sebet: Estonııa, Belarýs, Farer araldary, Kıpr, Fınlıandııa, Moldova, Armenııa, Bolgarııa, Qazaqstan, Lıýksembýrg, Latvııa, San-Marıno.
Besinshi sebet: Malta, Ázerbaıjan, Lıtva, Andorra, Gıbraltar, Lıhtenshteın.
Jerebe tartý rásimi 6 jeltoqsanda Qazaqstan ýaqytymen saǵat 22:00–de Soltústik Irlandııa astanasy Belfast qalasynda ótedi. Qurlyqtyq básekeniń fınaldyq kezeńine 12 toptyń jeńimpazdary jáne ekinshi oryn alǵandar arasyndaǵy úzdik segiz qurama tikeleı joldama alady.
Eýropa chempıonatynyń fınaldyq kezeńi 2028 jyldyń 9 maýsym-9 shilde aralyǵynda Anglııa, Shotlandııa, Ýels jáne Irlandııada ótedi. Onda barlyǵy 24 qurama synǵa túsedi.
Eske salsaq, budan buryn Qazaqstan quramasy UEFA Ulttar lıgasyn tórtinshi orynmen aıaqtady.