Qazaqstan fýtbol quramasy Erevanǵa jetti
ASTANA. QazAqparat - Qazaqstan quramasy Larnakadan charterlik reıspen Armenııa astanasy Erevanǵa keldi, dep habarlaıdy QazAqparat Qazaqstan fýtbol federatsııasyna silteme jasap.
Eki saǵat joldan keıin komanda qala ortasyndaǵy qonaqúılerdiń birine ornalasty. Keshke Erevandaǵy «Banants» fýtbol klýbynyń stadıonynda alǵashqy jattyǵý ótpek.
Erteń komandanyń match aldyndaǵy jattyǵý jáne bas bapker Aleksandr Borodıýktiń qatysýymen baspasóz máslıhaty bolady.
2018 jylǵy Álem Chempıonatynyń irikteý týrnırindegi Armenııa men Qazaqstan arasyndaǵy match 26 naýryz kúni Vazgen Sarkısıan atyndaǵy Respýblıkalyq stadıonda ótedi. Oıyn Astana ýaqytymen 22:00-de bastalady.
