Qazaqstan fýtbol quramasy FIFA Series 2026 týrnırinde kimdermen oınaıdy

ASTANA.KAZINFORM - Qazaqstan fýtbol quramasynyń FIFA Series 2026 týrnırindegi qarsylastary anyqtaldy.

Halyqaralyq fýtbol federatsııasy (FIFA) jańa FIFA Series 2026 halyqaralyq týrnırindegi Qazaqstan quramasynyń toptaǵy qarsylastaryn bekitti.

Qazaqstan quramasy Namıbııa, Komor araldary jáne Kýveıtpen oınaıdy. Matchtar 2026 jyldyń 23-31 naýryz kúnderi aralyǵynda Astana qalasyndaǵy «Astana Arena» stadıonynda ótedi.

Qazaqstan FIFA Series 2026 týrnırin qabyldaıtyn alǵashqy elderdiń qataryna endi. Sonymen qatar, Aýstralııa, Ázerbaıjan, Indonezııa, Mavrıkıı, Pýerto-Rıko, Rýanda jáne Ózbekstan da matchtar ótkizedi. Áıelder quramalarynyń oıyndary Brazılııa, Kot-d’Ivýar jáne Taılandta ótedi.

Ár topta túrli qurlyqtan tórt komanda bolady. Ár qurama eki oıynnan ótkizedi. Bul kúntizbedegi match sanyn kóbeıtpeýge múmkindik beredi. Osynyń arqasynda halyqaralyq kezdesýlerdiń sapasyn arttyrýdy kózdeıdi.

Halyqaralyq fýtbol federatsııasy (FIFA) 2026 jyldyń naýryz jáne sáýir aılarynda ótetin FIFA Series jańa halyqaralyq týrnırdiń jobasyn resmı túrde jarııalady.

Bul joba álemniń ártúrli qurlyqtaryndaǵy erler jáne áıelder quramalaryn bir alańǵa jınap, tájirıbe almasýǵa múmkindik beredi.

Týrnırdiń basty maqsaty – ulttyq quramalarǵa basqa konfederatsııa komandalarymen oınaýǵa jaǵdaı jasap, fýtbol mádenıetterin jaqyndastyrý. 

FIFA Series alǵash ret 2024 jyly pılottyq formatta ótken bolatyn. Al 2026 jyly týrnır tolyq kólemde uıymdastyrylyp, alǵash ret áıelder quramalaryn da qamtıdy.

Eske salsaq, budan buryn fýtboldan UEFA Chempıondar lıgasy negizgi kezeńi jetinshi týryndaǵy qazaqstandyq «Qaırat» (Almaty) jáne Belgııanyń «Brıýgge» (Brıýssel) komandalary arasyndaǵy kezdesýde qaı eldiń tóreshileri qyzmet atqaratyny belgili boldy.