Qazaqstannyń fýtbol klýbtaryn satyp alǵysy keletin olıgarhtardyń esimderi belgili boldy

ALMATY. KAZINFORM – Qazaqstandaǵy qazir memleketke tıesili fýtbol klýbtary jaqyn arada jeke ınvestorlardyń qolyna ótýi múmkin.

Prezıdent Qasym-Jomart Toqaev buǵan deıin memlekettik organdarǵa fýtbol klýbtaryn jekeshelendirýdi tapsyrǵan edi. Premer-mınıstr Oljas Bektenovtiń depýtattyq saýalǵa bergen jaýabyna qaraǵanda, Prezıdent tapsyrmasyn oryndaý boıynsha jumystar nátıjesin bere bastady.

Qazirdiń ózinde fýtbol komandalaryn satyp alýǵa nıetti jeke kompanııalar men iri bıznes ókilderi tabylǵan.

– «Ortalyq Azııa janarmaı-energetıkalyq kompanııasy» AQ (Sergeı Kan) «Qyzyl-Jar» klýbyn satyp alýǵa qyzyǵýshylyq bildirdi; Freedom Finance (Tımýr Týrlov) «Shahter» klýbyna arnalǵan jańa stadıon men akademııa salýdy kózdep otyr. Kaspi Group (Mıhaıl Lomtadze) – «Jeńis» klýbyn satyp alyp, Astanada fýtbol ınfraqurylymyn damytýǵa nıetti. TAU GROUP LTD (Islam Qozbaqov) «Qaısar» klýbyn satyp alýdy josparlap otyr. Sondaı-aq «Taraz», «Elimaı» jáne «Ertis» klýbtary boıynsha da kelissózder júrip jatyr. Protsesti jedeldetý úshin Úkimet 2021-2025 jyldarǵa arnalǵan keshendi jekeshelendirý josparyn jańartyp, qujatty memlekettik organdarmen kelisý kezeńinde, - delingen Premer-mınıstrdiń jaýabynda.

Ázirshe klýbtar áli satylmaǵan, sondyqtan olar memlekettik bıýdjet esebinen qarjylandyrylyp otyr. 2025 jylǵa fýtbolǵa 34,9 mlrd teńge qarastyrylǵan, onyń ishinde 31,8 mlrd teńge – kásibı klýbtarǵa, 3,1 mlrd teńge – balalar jáne buqaralyq sportqa baǵyttalǵan.

Alaıda bul qarajattyń jumsalýy muqııat tekserilip jatyr.

– 2021-2025 jyldar aralyǵynda júrgizilgen aýdıt nátıjesinde 12-den astam tekseris ótti. 100-den astam zańbuzýshylyq anyqtaldy, onyń ishinde artyq smeta, qaıtalanǵan qyzmetter men tıimsiz shyǵyndar bar. «Aqtóbe» jáne «Qyzyl-Jar» klýbtarynda sybaılas jemqorlyq belgileri anyqtalǵan. Mysaly, Aqtóbe oblysynyń prokýratýrasy 250 mln teńgeden astam qarjynyń maqsatsyz jumsalǵanyn anyqtady. Onyń ishinde oıynshylarǵa negizsiz bonýs tóleý men merdigerlerdiń baǵany kóterip kórsetýi bar, - dep jazylǵan resmı jaýapta.

Eske salaıyq, buǵan deıin Premer-mınıstr Oljas Bektenov Týrızm jáne sport mınıstrligine tez arada Almaty taý klasterin damytý josparyn jańartýdy jáne fýtbol klýbtaryn jekeshelendirýdiń jospar-kestesin ázirleýdi tapsyrǵanyn habarlaǵanbyz.