Qazaqstan fýtbol federatsııasynyń saılaýy qalaı ótedi
NUR-SULTAN. QazAqparat – Qazaqstan fýtbol federatsııasynyń bas hatshysy Azamat Aıtqojın Qazaqstan fýtbol federatsııasynyń prezıdenti laýazymyna saılaý qalaı ótetinin aıtyp berdi, dep habarlaıdy QazAqparat KazFootball.kz saıtyna silteme jasap.
QFF kezekti XXI saılaý konferentsııasy 2022 jylǵy 28 aqpanda Nur-Sultan qalasynda ótedi.
«7 aqpanda QFF músheleri arasynan úmitkerlerdi usynýǵa ótinim berý merzimi aıaqtaldy. Sodan keıin QFF saılaý reglamentine sáıkes, kelip túsken barlyq qujattar saılaý komıtetiniń qaraýyna berildi. 10 aqpanda saılaý komıtetiniń otyrysynda QFF prezıdenti laýazymyna saılaýǵa qatysý úshin kandıdattar tirkeldi.
QFF Jarǵysynyń talaptaryna sáıkes, Prezıdent saılaýy jasyryn daýys berý arqyly ótedi. QFF-nyń árbir múshesi bir daýysqa ıe. Saılaýda jeńiske jetý úshin kandıdat kóp daýys (jarty daýys jáne bireýi) jınaýy kerek. Eger kandıdattardyń birde-biri daýys berýdiń birinshi týrynda qajetti daýys sanyn ala almasa, ekinshi týr taǵaıyndalady. Daýys berýdiń ekinshi kezeńine birinshi týrda eń kóp daýys jınaǵan eki úmitker qatysady. Ekinshi týrda jeńiske jetý úshin kóbirek daýys jınaý kerek», - dedi A. Aıtqojın.
Konferentsııaǵa «Qazaqstan Fýtbol Federatsııasy «Qaýymdastyǵy» ZTB múshelerinen delegattar, sondaı-aq QFF Atqarýshy komıtetiniń músheleri qatysady. Dástúr boıynsha konferentsııaǵa halyqaralyq fýtbol qaýymdastyǵynyń baqylaýshylary retinde qatysatyn FIFA men ÝEFA ókilderi de shaqyrylady.
Aıta keteıik, keshe Ádilbek Jaqsybekov Qazaqstan fýtbol federatsııasynyń prezıdenti laýazymyn saılaýdaǵy jańa merzimge qatysýdan bas tartty.
Nátıjesinde aldaǵy saılaýǵa kelesi úmitkerler tirkeldi:
- Barmenqulov Ádilet Nazarbaıuly – QFF Atqarý komıtetiniń múshesi, «Qazaqstan Fýtbol federatsııasy» qaýymdastyǵy» ZTB prezıdentiniń keńesshisi;
- Jarylqasynov Erlan Erkinbekuly – «Qazaqstan áýesqoı fýtbol lıgasy» QB tóraǵasy;
- Qanıev Berik Seralyuly – QFF Atqarý komıtetiniń múshesi, «Lancaster Group Kazakhstan» AQ dırektorlar keńesiniń tóraǵasy;
- Lorııa Davıd Grıgorevıch – «Nur-Sultan qalasynyń Fýtbol federatsııasy qaýymdastyǵy» ZTB prezıdenti;
- Orazbekov Qaırat Aıtmoldauly – QFF Atqarý komıtetiniń múshesi, «Qaırat» AFK prezıdenti.
