Qazaqstan Fýtbol federatsııasy ÝEFA-nyń 700-den astam bapkerin daıarlady
NUR-SULTAN. QazAqparat – Qazaqstanda 800 myńnan astam fýbolmen júıeli túrde aınalysady. Bul týraly Májilis depýtattarynyń saýalyna QR Premer-Mınıstri Álıhan Smaıylovty jaýabynda aıtylǵan, dep habarlaıdy QazAqparat tilshisi.
«Qazaqstanda sporttyń bul túrimen (fýtbolmen) júıeli túrde 800 myńnan astam adam shuǵyldanady, onyń 62 paıyzy - aýyldyq jerlerde. Balalar men jasóspirimder sport mektebinde fýtbolmen 37 myńnan astam bala aınalysady. Fýtbolmen aınalysý úshin 280 stadıon jáne 148 fýtbol maneji jumys isteıdi. Sonymen qatar búgingi kúni 400-den astam dene shynyqtyrý-saýyqtyrý keshenderi bar. Olardyń kópshiligi fýtbol alańdarymen qamtamasyz etilgen. Jalpy bilim berý jáne sport mektepterinde 7 000-nan astam fýtbol alańdary qarastyrylǵan. Kásibı klýbtardyń janynda 7-18 jastaǵy 7 myńǵa jýyq balany qamtıtyn 17 fýtbol ortalyǵy men eki akademııa qyzmet etedi», - dedi Úkimet basshysy jaýabynda.
Onyń atap ótýinshe, Qazaqstan Fýtbol federatsııasy qyzmetiniń negizgi baǵyttarynyń biri − jattyqtyrýshylardy daıarlaý jáne olardyń biliktiligin arttyrý. Federatsııa ÝEFA-ǵa qosylyp, eýropalyq ádistemeler boıynsha mamandar daıarlaý quqyǵyna ıe boldy. Túrli deńgeıdegi jattyqtyrýshylarǵa Eýropa elderinde jumys isteýge múmkindik beretin sanattar taǵaıyndaldy. Kýrstardy, sabaqtar men semınarlardy ótkizýge otandyq jáne sheteldik mamandar belsendi tartylady.
«Sońǵy 10 jylda federatsııa ÝEFA-nyń 700-den astam bapkerin daıarlady. Qazirgi ýaqytta Qazaqstanda 28 kásibı fýtbol klýby óner kórsetedi, onyń ishinde 14 klýb premer-lıgada, 7 − birinshi lıgada jáne 7 − ekinshi lıgada. Halyqaralyq tájirıbeniń negizinde 2015 jyly Qazaqstanda fýtbol jarystaryn ótkizý reglamentine «qazaqstandyq fýtbol tárbıelenýshisi» degen uǵym engizildi. Elimizde tirkelgen 333 kásibı fýtbolshynyń 210 (63%) qazaqstandyq fýtboldyń tárbıelenýshileri. Fýtboldan ulttyq chempıonattyń erejesine sáıkes premer-lıga klýby 8 legıonerdi ǵana málimdeı alady, bir ýaqytta alańǵa 6 legıoner shyǵa alady. Birinshi lıganyń klýbtary 3 legıonerdi ǵana shaqyra alady. Qalǵan fýtbolshylar qazaqstandyq fýtbol tárbıelenýshileri bolýy tıis. Ekinshi lıga klýbtaryna legıonerlerdi shaqyrýǵa tyıym salynǵan», - dedi Álıhan Smaıylov.
