Qazaqstan fýtbol federatsııasy ortanqol legıonerlerden qutylmaqshy
ASTANA. QazAqparat - Qazaqstan fýtbol federatsııasynyń jańa strategııasynda legıonerlerdiń jas erekshelikterine qaraı shekteý engizý josparlanǵan, dep xabarlaıdy QazAqparat tilshisi.
QFF Bas xatshysy Azamat Aıtxojınnyń aıtýynsha, legıonerlerdiń daıyndyǵyna qatysty syn-eskertpeler kóptep túsýde.
"Árıne, otandyq fýtboldyń sapasyn arttyrý úshin kásibı klýbtardyń quramyna tek bilikti legıonerlerdi ǵana tartýymyz qajet. Al ortanqol oıynshylardan qutylǵanymyz jón. Máselen, Tıtov, Tıxonov, Tımoşıýk, Maksımovıch, Goý, Kabananga sııaqty sheberler otandyq fýtboldyń damýyna oń áser etti. Qazirgi kezde ishki chempıonatqa Andreı Arshavın, Patrık Tvýması, Ivan Maevskıı syndy fýtbolshylar óz úlesterin qosyp keledi. Olarǵa qarap, bizdiń oıynshylarymyz da tájirıbe jınaqtaýda", - dedi A.Aıtxojın Qazaqstan fýtbol federatsııasynyń XVII konferentsııasynda.
Onyń sózine qaraǵanda, uıymnyń jańa strategııasyn iske asyrý baǵdarlamasyna legıonerler úshin jas erekshelikterine qaraı shekteý engizý máselesi qaralatyn bolady.
"Sonyń nátıjesinde Qazaqstanǵa ortanqol fýtbolshylar kele almaıdy. Áıtpese, olar bizdiń fýtboldy tek ózderiniń sporttyq mansabyn aıaqtaýdyń "jyly ári tabysty jeri" retinde qarastyrady", - dep atap kórsetti A.Aıtxojın.
Aıta keteıik, búgingi konferentsııada QFF-nyń "Alǵa, fýtbol! Alǵa, Qazaqstan!" atty jańa strategııasy tanystyryldy. Atalǵan qujatta batyl bir maqsat bar. Ol - fýtboldyń qazaqstandyq stılin qalyptastyrý. Sonyń arqasynda Qazaqstannyń fýtboly barsha álemge tanylady degen jospar bar. Sondaı-aq, jańa strategııada áıelder klýbtaryn arttyrý mindeti belgilenip otyr.
