Qazaqstan Fýtbol federatsııasy eshqandaı alaıaqtyqqa jol bermeıtin bolady - Saıan Hamıtjanov
ALMATY. Maýsymnyń 4-i. QazAqparat /Erbol Turymbetov/ - Búgin Almatyda Qazaqstan Fýtbol federatsııasy men Býkmekerler jáne totalızatorlar qaýymdastyǵy basshylary fýtbol oıyny men býkmekerlik keńseler arasyndaǵy jymysqy áreketterge jol bermeıtin ózara kelisimge qol qoıdy,
dep habarlaıdy QazAqparat.
«Qazaqstan Fýtbol federatsııasy men Býkmekerler jáne totalızatorlar qaýymdastyǵy arasyndaǵy áriptestik kelisimine qol qoıý» dep atalatyn baspasóz máslıhatyn QFF uıymdastyryp otyr.
«Kóp jaǵdaıda bizdiń keńselerge aqsha tigý úshin oıynǵa qatysatyn aıaqdopshylardyń týysqandary nemese dostary kelip jatady. Olardyń kóbisi qyzmetkerlerimizge ábden tanymal da. Endi bul jaǵdaıǵa jol bermeı, óz bıznesimizdiń qaýipsizdigi úshin federatsııaǵa statıstıkalyq málimetterdi berip otyratyn bolamyz», dedi qaýymdastyq prezıdenti Nıkolaı Eskendirov.
Qazirgi tańda álemdik fýtboldyń bas aýyrtatyn ózekti máseleleriniń biri - ótetin oıyn men býkmekerlik keńseler arasyndaǵy deldaldardyń jymysqy áreketi bolyp otyr. Bul jaǵdaı, ásirese, ótetin oıyndardyń kútpegen jaǵdaıǵa ózgerip ketýine ákep soǵýda. Soǵan baılanysty UEFA prezıdenti Mıshel Platenı ótken jeltoqsan aıynda oıyn barysynyń ádiletti ótýin qadaǵalaıtyn arnaıy komıssııa qurǵan bolatyn.
«Biz osy kelisimge qol qoıý arqyly oıyndardyń taza ótýin qamtamasyz etetin bolamyz. Nazarǵa ilingen qandaı da bir alaıaqtyq áreketke tıisti jaza qoldanylady», dedi QFF Bas hatshysy Saıan Hamıtjanov.
