Qazaqstan fýtbol federatsııasy «Aqtóbeniń» máselesine qatysty málimdeme jasady
ASTANA. QazAqparat - Qazaqstan fýtbol federatsııasy (QFF) «Aqtóbe» fýtbol klýbynyń aınalasynda qalyptasqan máselege baılanysty málimdeme taratty, dep habarlaıdy QazAqparat.
«Qazaqstan fýtbol federatsııasy Halyqaralyq fýtbol qaýymdastyqtarynyń federatsııasyna (FIFA) múshe bolý - ulttyq qaýymdastyqtar men fýtbol sýbektilerin uıymnyń jarǵysy men erejelerin saqtaýǵa mindetteıdi. QFF «Aqtóbe» fýtbol klýbynyń ishki jáne halyqaralyq arenadaǵy tabystaryn eskere otyryp, chempıonatqa, fýtbolshylar men fýtbol qoǵamdastyǵyna nuqsan keltirmeıtindeı retteýge talpyndy. Sondaı-aq FIFA men QFF-tyń erejeleri men qujattaryn qatań saqtaý jóninde klýbty birneshe ret habardar etti. Sonymen qatar, oıynshylar aldynda qaryzdy mindetti túrde óteý qajettigin habarlady, - delingen QFF málimdemesinde.
Atap ótilgendeı, FIFA men Qazaqstan fýtbol federatsııasynyń zań organdarynyń sheshimin elemeý jáne oryndamaý arqyly qatań sanktsııalarǵa ushyraıtyny jóninde «Aqtóbe» fýtbol klýby oblys jetekshiliginiń deńgeıine deıin birneshe márte eskertilgen.
«Qazirgi ýaqytta fýtbol klýbyna qatysty sot isi joǵaryda aıtylǵan qujattardyń talabyna qaıshy júrip jatyr», - dedi QFF-tan.
Eske salaıyq, buǵan deıin qazaqstandyq birqatar BAQ-ta FIFA-dan QFF-tiń jaýapty hatshysynyń atyna hat kelgeni aıtyldy. Onda Halyqaralyq federatsııa QFF-tan «Aqtóbe» fýtbol klýbyna jáne onyń burynǵy oıynshylaryna qatysty sot otyrystaryna núkte qoıý úshin «qısyndy sharalar qabyldaýdy» suraǵan. Sot otyrystary qazir Aqtóbe qalalyq sotynda ótýde.
