Qazaqstan frantsýz EDF kompanııasymen strategııalyq áriptestikti kúsheıtedi
ASTANA. KAZINFORM — Qasym-Jomart Toqaev Electricité de France kompanııasynyń basqarma tóraǵasy jáne bas atqarýshy dırektory Bernar Fontanany qabyldady. Bul týraly Aqordanyń baspasóz qyzmeti málim etti.
Áńgimelesý barysynda Qazaqstan men EDF arasyndaǵy yntymaqtastyqtyń qazirgi jaı-kúıi men damý perspektıvasy talqylandy.
— Kompanııa tómen kómirtekti jáne atom energetıkasy salasy boıynsha álemdegi jetekshi uıym sanalady. Prezıdent birlese jumys isteýge mol múmkindik bar ekenin atap ótip, elimiz frantsýz kompanııasymen ózara yqpaldastyqty nyǵaıtýǵa erekshe mán beretinine toqtaldy, — delingen habarlamada.
EDF basqarma tóraǵasynyń aıtýynsha, kompanııa ornyqty jáne zamanaýı energetıkalyq ınfraqurylym boıynsha baılanystardy odan ári jandandyrýǵa nıetti. Prezıdent Qazaqstan halyqaralyq seriktestermen, sonyń ishinde EDF kompanııasymen ashyq jáne teń dárejeli qaǵıdattarǵa saı tıimdi yntymaqtastyq ornatýǵa daıyn ekenin rastady.
Kezdesýde ýran jetkizý boıynsha ózara is-qımyl máseleleri qarastyryldy.
Buǵan deıin Memleket basshysy EQYU Parlamenttik assambleıasynyń tóraǵasy Pere Joan Ponspen kezdesken bolattyn. Taraptar Qazaqstan Eýropa qaýipsizdik jáne yntymaqtastyq uıymymen, sondaı-aq onyń Parlamenttik assambleıasymen seriktestikti nyǵaıtýǵa múddeli ekeni atap ótildi.
