Qazaqstan Frantsııanyń energetıkalyq qaýipsizdiginiń kilti – Bloomberg
Bloomberg aqparat agenttiginiń habarlaýynsha, Frantsııa prezıdenti Emmanıýel Makron energoresýrstarǵa baı Ortalyq Azııaǵa sapar shegedi. Ol ýran jetkizetin eki memleket - Qazaqstan men Ózbekstan barýdy kózdep otyr, dep habarlaıdy Kazinform.
Frantsııa prezıdentine jaqyn aqparat kózderiniń habarlaýynsha, Makronnyń saparynyń maqsaty Frantsııanyń energetıkalyq qaýipsizdigin nyǵaıtý.
Munaı men gaz qory zor, qoıny-qonyshy qazba baılyqtarǵa toly Ortalyq Azııa Eýropany qyzyqtyryp otyr. Eýropalyq Odaq óńirde Kavkaz arqyly Eýropaǵa jol tartatyn saýda jáne energetıkalyq dáliz salýǵa umtylýda.
Búgingi tańda Frantsııa Ortalyq Azııa óńirine salynǵan iri ınvestıtsııalarymen maqtana alady. Mysaly Frantsııanyń Areva degen ataýmen tanymal Orano S.A. kompanııasy Qazaqstanda «Qazatomónerkásip» memlekettik kompanııasymen birge ýran kenishteri boıynsha jumys júrgizip jatyr.
Frantsııalyq ınsaıderlerdiń biriniń sózinshe, Emmanıýel Makronnyń sapary barysynda kompanııanyń qazaqstandyq naryqty kóbirek qamtý máselesi sóz bolmaq.
Frantsııaǵa ýran óndirý isi Nıgerde shilde aıynda bolǵan tóńkeristen keıin ózektilene tústi. Óıtkeni Nıger Eýropalyq Odaq úshin Qazaqstannan keıin ekinshi ýran kózi bolatyn.
Orano kompanııasy Saharadaǵy kásiporyndarynyń birinde ýran óndirý isin toqtatýǵa májbúr boldy. Óıtkeni olarda sanktsııalarǵa baılanysty logıstıka boıynsha birqatar qıyndyq týdy.
«Qazaqstan Frantsııa úshin energetıkalyq qaýipsizdiktiń kilti dese bolady. Makronnyń sapary Parıjdiń yntymaqtastyqqa daıyn ekendiginiń kórsetkishi bolmaq»,- deıdi Parıj halyqaralyq qatynastar ınstıtýtynyń zertteýshisi Maıkl Levıstoýn.
Frantsııa Ekonomıka mınıstrliginiń málimetterinshe, ótken jyly Qazaqstan Frantsııaǵa iri ýran jetkizýshi bolyp qana qoımaı, 2021 jyly birinshi orynnan tómendegen soń, shıki munaı kóziniń kólemi boıynsha ekinshi orynǵa turaqtady.
Elıseı saraıy ókiliniń aıtýynsha, Frantsııa prezıdentimen birge energetıka, agro azyq-túlik, taý-ken óndirý sektorlarynan 15 ókil, sondaı-aq Electricite de France SA kompanııasy men Assystem SA ınjenerlik kompanııasynyń ókilderi kelip, ıadrolyq reaktorlar salý máselesi boıynsha, konsýltatsııa júrgizedi.
Bul Qazaqstannyń AES salý boıynsha referendým ótkizýge daıyndalyp jatýymen baılanysty bolýy yqtımal. Frantsııa sonymen qatar Qazaqstannyń kelesi jyldan bastap, sırek kezdesetin metaldardy óndirý isin qolǵa alǵaly otyrǵandyǵynan da habardar.
Emmanıýel Makron Mońǵolııaǵa baryp, iri kólemde ýran satyp alý týraly kelisimge qol qoıǵan Frantsııanyń tuńǵysh prezıdenti.
Sondaı-aq ol Azııa-Tynyq muhıty ekonomıkalyq yntymaqtastyq sammıtine qatysqan alǵashqy Frantsııa kóshbasshysy.
